AVROPA ŞURASI PARLAMENT ASSAMBLEYASI YAY SESSİYASININ GÜNDƏLİYİ AÇIQLANMIŞDIR
AZƏRTAC-ın xüsusi müxbiri xəbər verir ki, Avropa Şurası Parlament Assambleyasının yay sessiyasının gündəliyi aşıqlanmışdır.
İyunun 23-dən 27-dək davam edəcək sessiyanın ilk iş günündə büro, komitə və qrupların yığıncaqlarından sonra Gürcüstan və Makedoniyada keçirilmiş seçkilərin nəticələri, Qara dənizin ətraf mühitinə təhlükə törədən hərəkətlərə qarşı mübarizə məsələsi müzakirə olunacaq, Avropa Şurası Nazirlər Komitəsinin yeni sədri seçilmiş İsveçin xarici işlər naziri Karl Bildt rəhbərlik etdiyi qurumun fəaliyyəti ilə bağlı hesabat verəcəkdir.
Sessiyanın ikinci günü Azərbaycanda demokratik təsisatların fəaliyyəti ilə bağlı ölkəmiz üzrə həmməruzəçilərin məruzələri dinləniləcək, müasir cəmiyyətdə qadınların hüquqlarının gücləndirilməsi ətrafında müzakirələr aparılacaqdır.
Sonrakı günlərdə Çində siyasi, Avropada demokratik vəziyyət, Türkiyədə demokratik institutların və Beynəlxalq Qızıl Xaç Komitəsinin fəaliyyəti, uşaqlara qarşı zorakılıqla mübarizə və digər məsələlərin müzakirəsi nəzərdə tutulmuşdur.
Sessiyada Ermənistanda demokratik institutların fəaliyyətinə dair növbədənkənar müzakirələrin keçirilməsi də planlaşdırılır. Xatırladaq ki, aprel sessiyasında Ermənistanda keçirilmiş prezident seçkiləri zamanı baş vermiş hadisələrə münasibət bildirilmiş və məsələni yerindəcə öyrənmək məqsədilə bu ölkəyə həmməruzəçilərin göndərilməsi, məsələnin yay sessiyasında müzakirə edilməsi qərara alınmışdı. Bununla əlaqədar həmməruzəçilərin Ermənistana iyunun 16-17-nə nəzərdə tutulmuş səfərlərinin reallaşacağı təqdirdə məsələ gündəliyə salınacaqdır.
Sessiyanın gedişi zamanı Serbiyanın Prezidenti Boris Tadiç, Türkiyənin xarici işlər naziri Əli Babacan, Mərkəzi Asiya və Avropa məsələləri üzrə regional direktor Miklos Marşall, miqrasiya üzrə siyasi qrupun rəhbəri Jan Niessin və digər siyasi liderlər deputatlar qarşısında çıxış edəcəklər.
Bölmənin digər xəbərləri
