Avstriya Slovakiyada “Moxovtse” AES-in yeni reaktorlarının işə salınmasına qarşıdır
Vyana, 4 aprel, AZƏRTAC
Avstriya hökuməti Slovakiyada “Moxovtse” atom elektrik stansiyasının (AES) genişləndirilməsinə qarşıdır. Buna səbəb yayda işə salınmalı olan 2 yeni reaktorun təhlükəsizlik standartlarına cavab verməmələrinə dair məlumatlar olub.
AZƏRTAC xəbər verir ki, Avstriyanın ekologiya naziri Elizabet Köstinqer qonşu ölkədəki AES-in iki yeni reaktor blokunda kobud tikinti və təhlükəsizlik qüsurlarından narahat olduqlarını ifadə edib.
O, “həyəcan doğuran hesabatlar” əsasında Slovakiyanın müvafiq qurumlarını məsələyə aydınlıq gətirməyə çağırıb. Nazir bu ilin yay aylarına fəaliyyətə başlamalı olan üçüncü reaktorda təhlükəsizlik örtüyünün standartlara cavab verməməsini qəbuledilməz hal kimi dəyərləndirib. Qüsurlar aradan qaldırılmadığı təqdirdə Avstriya tərəfi AES-in yeni reaktor bloklarının fəaliyyətə başlamasını hər vasitə ilə dayandırmağa çalışacaq.
Avstriyanın müxalifət partiyaları isə öz hökumətlərini tənqid atəşinə tutublar. Avstriya Sosial-Demokratlar Partiyasının üzvü Andreas Şider ekologiya nazirini qonşu ölkədəki bu AES-in genişləndirilməsinə göz yummaqda ittiham edib. Tələb edib ki, Avropa Komissiyasına şikayət edilməli, yeni reaktorların tikintisi dərhal dayandırılmalı və onların fəaliyyət göstərməsinə qadağa qoyulmalı, bu yolla da bizim və övladlarımızın həyatı Avropada belə bir fəlakətdən qorunmalıdır.
Vyanadan 150 kilometr şərqdə yerləşən “Moxovtse” AES-in 1998-ci ildən fəaliyyətdə olan iki reaktoru 940 meqavat elektrik enerjisi hasil edir. Slovakiya hökuməti yeni iki reaktorla əlavə 942 meqavat enerji əldə ediləcəyinə ümid bəsləyir.
Qeyd edək ki, 1978-ci ildən nüvə enerjisindən imtina edən Avstriya Avropada nüvə enerjisinin istehsalı və istehlakına qarşı mübarizə aparan əsas ölkələrdən biridir.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
