Bakı, 18 may (AZƏRTAC). Mayın 18-də Azərbaycan Dövlət Yuğ Teatrında polşalı rejissor Tomaş Leşçinskinin quruluşunda Slavomir Mrojekin pyesi əsasında səhnələşdirilmiş “Sərhəddə” adlı tamaşa nümayiş olunmuşdur.

AZƏRTAC xəbər verir ki, tamaşa beynəlxalq müştərək prodüser layihəsi çərçivəsində hazırlanmışdır.

Dövlət teatrları sistemində ilk beynəlxalq müştərək prodüser layihəsi olan tamaşada rolları Yuğ Teatrının aktyorları - əməkdar artistlər Vidadi Həsənov, Sonaxanım Mikayılova, aktyorlar Yaqut Paşazadə, Təranə Atacan, Qasım Nağı, Oqtay Mehdiyev, Ər-Toğrul Kamalov və Emil Məlikov ifa etmişlər.

Tamaşanın quruluşçu rejissoru Tomas Leşçinski, quruluşçu rəssamı Elena Lola Lolidir.

Layihə Polşanın ölkəmizdəki səfirliyi, Azərbaycanın Mədəniyyət və Turizm Nazirliyi, Yuğ Dövlət Teatrı, “AR Production” - Beynəlxalq Prodüser Şirkəti, A.Mitskeviç İnstitutu və prodüser Səbuhi Məmmədovun təşəbbüsü ilə reallaşdırılır.

Layihənin fərqli məziyyəti beynəlxalq xarakter daşıması və bir neçə təşkilatın iştirakı ilə həyata keçirilməsindən ibarətdir.

“Sərhəddə” tamaşasında mənzillərini dövlət sərhədi bölmüş bir ailənin həyatından bəhs edilir. Ailəvi şam yeməyi yeyərkən diplomatlar gəlir və uzun müzakirələrdən sonra ailə başçısına bildirirlər ki, onların evlərindən dövlət sərhədi keçəcək və bu sərhəd

ailə üzvlərinin hərəsini müxtəlif dövlətlərin vətəndaşlarına çevirəcəkdir.

Evin sərhədlərə bölünməsi ilə ailənin bütün varlığı əməlli-başlı problemə çevrilir. Tamaşanın sonunda qüvvələr hərbi qarşıdurmaya hazırlaşır. Ailə üzvləri isə buna əhəmiyyət verməyərək əvvəlki kimi öz həyatlarını yaşamağa çalışırlar. Hətta onlar sərhəddə toplaşan əsgərləri ev sahibinin doğum gününə dəvət edirlər.

S.Mrojek üslubuna sadiq qalaraq bu pyesdə də finalı açıq saxlayır. Tamaşaçı nə baş verəcəyini özü düşünməlidir.

Tamaşa cəbhələrə, sərhədlərə bölünmüş, müharibələrə, qətllərə, terrorlara meydan olmuş dünyanın çağdaş mənzərəsinin obrazlı şəkildə təqdim olunması ilə əlamətdardır.