Azərbaycan Əmanətlərin Sığortalanması Fondunun nümayəndələri İstanbulda qurumun gələcək hədəflərindən danışıblar
Bakı, 11 may, AZƏRTAC
Azərbaycan Əmanətlərin Sığortalanması Fondunun (ADIF) nümayəndə heyəti Türkiyənin İstanbul şəhərində Beynəlxalq Əmanətlərin Sığortalanması Assosiasiyasının (IADI) Avrasiya Regional Komitəsinin (EARC) illik toplantısı çərçivəsində “Böhranın idarə edilməsi: ənənəvi və yeni yanaşmalar” mövzusunda keçirilən beynəlxalq konfransda iştirak edib.
ADIF-dən AZƏRTAC-a bildirilib ki, Avrasiya Regional Komitəsinin sədri İlhami Öztürk, Türkiyə Əmanətlərin Sığortalanması Fondunun sədri Muhiddin Gülal, Dünya Bankının nümayəndəsi Miquel Dijkman, Almaniya, İtaliya, Koreya, Filippin, İndoneziya, Yaponiya, MDB ölkələri və Avropa ölkələrinin banklarının ləğvetmə və sağlamlaşdırma strukturlarının nümayəndələri ilə yanaşı, dünyanın aparıcı maliyyə qurumlarının rəhbərlərinin, mütəxəssislərin və alimlərin də qatıldığı tədbirdə banklarda yeni yaranan risklər barədə fikir mübadiləsi aparılıb.
ADIF nümayəndə heyəti son illərdə Azərbaycanda bütün sahələrdə aparılan dərin iqtisadi islahatlar, fondun gələcək hədəfləri, əmanətlərin sığortalanması sistemi və bankların ləğvetməsində dünya təcrübəsinin tətbiqi barədə geniş təqdimat keçirib.
EARC-ın illik toplantısı çərçivəsində keçirilən “dəyirmi masa”lara qatılan ADIF nümayəndə heyəti ləğvetmə zamanı risklər və problemlər və onların həlli barədə fikir mübadiləsi aparıb.
Bölmənin digər xəbərləri
