AZƏRBAYCAN HÖKUMƏT NÜMAYƏNDƏ HEYƏTİNİN SVERDLOVSK VİLAYƏTİNƏ SƏFƏRİ
Xəbər verdiyimiz kimi, baş nazir Artur Rasizadənin Azərbaycanın hökumət nümayəndə heyəti Sverdlovsk vilayətində işgüzar səfərdədir.
İyulun 9-da nümayəndə heyətinin üzvləri Nijni Tagildəki “Staratel” sınaq poliqonunda “Russian Expo Arms-2002” beynəlxalq silah, hərbi texnika və hərbi sursat sərgisinin açılışında iştirak etmişlər.
Nijni Tagil Sınaq Metalları İnstitutunun baş direktoru Valeri Rudenko sərgini açaraq bildirdi ki, sərgiyə dünyanın 40-dan artıq ölkəsindən nümayəndələr gəlmişlər.
Sərginin təşkilat komitəsinin rəhbəri Zinoviy Pak Rusiya hökumətinin sədri Mixail Kasyanovun təbrik məktubunu oxudu.
Sonra Rusiya Federal Məclisi Federasiya Şurasının sədri Sergey Mironov çıxış edərək, əmin olduğunu bildirdi ki, bu sərginin böyük perspektivləri və gələcəyi vardır. O, sərginin işində və müqavilələrinin imzalanmasında tədbir iştirakçılarına uğurlar arzuladı.
Sərgidə Uralvaqonzavodun və Perm şəhərindəki Motovilixa zavodunun ekspozisiyaları öz miqyasına görə diqqəti cəlb edirdi. Onların təqdim etdikləri eksponatlar arasında T-72 tankı əsasında yaradılmış yeni döyüş maşınları da var idi. “Qrad” və “Smerç” qurğularından 40 kilometr məsafəyə atəşlər nümayiş etdirildi. Bundan əlavə, yalnız qonaqlar üçün hazırlanmış mədəni proqram çərçivəsində “Nijni Tagil” sənaye mərkəzinin təqdimatı oldu.
Azərbaycanın hökumət nümayəndə heyəti iyulun 10-da Sverdlovsk vilayətinin hökuməti və qubernatoru ilə danışıqlar aparacaqdır. Qubernatorla danşıqlar zamanı əməkdaşlıq haqqında protokol imzalanacaqdır.
Oqtay Bayramov
AZƏRTAC-ın xüsusi müxbiri
Yekaterinburq
Bölmənin digər xəbərləri
