Qadınlar arasında sablya üzrə yarışın finalında Azərbaycan qılıncoynadanı Sevil Bünyadova polşalı Anjelika Vatorla qarşılaşıb. Gərgin keçən görüşdə polşalı idmançı Sevil Bünyadovanı 15:14 hesabı ilə məğlub edərək qızıl medal qazanıb.

Bürünc medallara isə Azərbaycan idmançısı Sevinc Bünyadova və fransalı Marqo Rifkis sahib olublar.

Medalları qaliblərə Avropa Qılıncoynatma Konfederasiyasının prezidenti Janda Frantisek təqdim edib.

19:40

Azərbaycanın digər qılıncoynadanı Sevinc Bünyadova qadınlar arasında yarışda sablya üzrə fərdi mübarizənin yarımfinalında polşalı Anjelika Vatorla qarşılaşıb. Görüşdə polşalı atlet 15:11 hesabı ilə qalib gələrək finala vəsiqə qazanıb.

19:19

Azərbaycanlı qılıncoynadan Sevil Bünyadova sablya üzrə fərdi yarışlarda fransalı Marqo Rifkisi 15:9 hesabı ilə vaxtından əvvəl məğlub edərək finala yüksəlib. 

17:08

Azərbaycan qılıncoynadanı Sevil Bünyadova yarımfinalda fransalı Marqo Rifkislə üz-üzə gələcək.

Sevinc Bünyadova isə finala gedən yolda polşalı Anjelika Vatorla qarşılaşacaq.

16:45

Sevil Bünyadova döddəbir finalda yunanıstanlı Vasiliki Vouqioukanı 15:12 hesabı ilə məğlub edərək yarımfinala yüksəlib.

İdmançımızın bacısı Sevinc Bünyadova da yarımfinalda oynamaq hüququ qazanıb. O, bu yolda ukraynalı Alina Komaşçuk ilə qarşılaşmada 15:11 hesabı ilə qalib gəlib.

16:28

Sevil Bünyadova rusiyalı Mariya Ridelə 15:9 hesabı ilə qalib gələrək dörddəbir finala yüksəlib. O, yunanıstanlı Vasiliki Vouqiouka ilə qarşılaşacaq.

Sevinc Bünyadova isə italiyalı Rebekka Qarqanonu 15:7 hesabı ilə məğlubiyyətə uğradaraq dörddəbir finala vəsiqə qazanıb. Onun rəqibi ukraynalı Alina Komaşçuk olacaq.

Bu mərhələdə Səbinə Mikina rusiyalı Yana Obvintseva ilə qarşılaşmada 13:15 hesabı ilə məğlub olub.

15:42

Yarışda onaltıdabir final mərhələsində mübarizə aparan Sevil Bünyadova rəqibi polşalı Maqdalena Pasternaka 15:4 hesabı ilə qalib gəlib. Növbəti mərhələyə çıxan idmançımız səkkizdəbir finalda rusiyalı Mariya Ridel ilə qarşılaşacaq.

Fatimə İbrahimova isə italiyalı Rebekka Qarqano ilə üz-üzə gəlib və 7:15 hesabı ilə məğlub olub. İtaliyalı Rebekka Qarqano səkkizdəbir finalda Sevinc Bünyadova ilə qarşılaşacaq.

Səbinə Mikina isə rusiyalı Yana Obvintseva ilə üz-üzə gələcək.

14:49

Yarışda onaltıdabir final mərhələsində mübarizə aparacaq Sevil Bünyadovanın rəqibi polşalı Maqdalena Pasternak olacaq. Fatimə İbrahimova isə italiyalı Rebekka Qarqano ilə görüşəcək. Sonuncu qarşılaşmanın qalibi səkkizdəbir finalda Sevinc Bünyadova ilə qarşılaşacaq. Səbinə Mikina isə rusiyalı Yana Obvintseva və rumıniyalı Bianka Pasku görüşünün qalibi ilə üz-üzə gələcək.

13:55

Azərbaycan qılıncoynadanı Səbinə Mikina da qrup mərhələsində keçirdiyi 5 görüşün hamısında qalib gəlib.

Digər sablyaçılarımızdan Fatimə İbrahimova və Sevil Bünyadova qrup mərhələsində keçirdikləri beş oyunda müvafiq olaraq 3 və 4 qələbə qazanıblar.

Qadınlar arasında sablya növü üzrə fərdi yarışlar davam edir.

13:18

Qadınlar arasında sablya növü üzrə fərdi yarışlar davam edir.

Sevinc Bünyadova qrup mərhələsində 5 görüş keçirib və hamısında qələbə qazanıb. O, ukraynalı dünya və Olimpiya çempionu Olqa Xarlan ilə qarşılaşmadan 5:3 hesabı ilə qalib ayrılıb.

Ümumilikdə fərdi yarışda 36 idmançı 6 qrupda mübarizə aparır. Azərbaycan qılıncoynadanlarından Sevinc Bünyadova, Fatimə İbrahimova, Səbina Mikina, Sevil Bünyadova qüvvəsini sınayırlar.

Sevinc Bünyadova AZƏRTAC-a müsahibəsində deyib: “Rəqiblərim güclü idi, amma mən onların hamısına qalib gəldim. Olqa Xarlanı məğlub edə biləcəyimə bir o qədər də inanmırdım. Amma səylə çalışaraq 5:3 hesabı ilə onu məğlubiyyətə uğratdım. O, əsas rəqibim idi. Bacım Sevil Bünyadovadan da qələbələr gözləyirəm".

11:05

Bakı, 25 iyun, AZƏRTAC 

İyunun 25-də birinci Avropa Oyunlarının qılıncoynatma yarışlarında daha iki dəst medalın sahibləri müəyyənləşəcək.

AZƏRTAC xəbər verir ki, yarışların üçüncü günündə kişilər arasında rapira, qadınlar arasında sablya ilə fərdi yarışlarda mükafatçılar müəyyənləşəcək.

Kişilər arasında rapira ilə fərdi yarışda Azərbaycan təmsil olunmur. Qılıncoynatma üzrə fərdi yarışların son günündə dörd qadın sablyaçımız mübarizə aparacaq.

Qadınlar arasında sablya növü üzrə fərdi yarışlarda 36 idmançı 6 qrupda mübarizəyə başlayacaq.

Azərbaycan qılıncoynadanlarından Sevinc Bunyadova “A”, Fatimə İbrahimova “D”, Səbina Mikina “E”, Sevil Bunyadova “F” qrupunda qüvvələrini sınayacaqlar.