AZƏRBAYCAN–KUBA HÖKUMƏTLƏRARASI KOMİSSİYASININ İKİNCİ İCLASI NOYABRDA BAKIDA KEÇİRİLƏCƏKDİR
AZƏRTAC-ın xüsusi müxbiri xəbər verir ki, Azərbaycanın Kubadakı səfiri Aqşin Mehdiyev iyunun 4-də Kuba Baş nazirinin müavini - dövlət naziri Rikardo Kabrisas Ruiz ilə görüşmüşdür.
Səfir A.Mehdiyev Kuba Nazirlər Şurasının qərarı ilə Azərbaycan-Kuba hökumətlərarası komissiyasına Kuba tərəfindən həmsədr təyin edilməsi münasibətilə həmsöhbətini təbrik etmişdir. O, bu təyinatın Kubanın Azərbaycan ilə əməkdaşlığa verdiyi önəmin təzahürü olduğunu bildirmişdir. Səfir ümidvar olduğunu bildirmişdir ki, bundan sonra komisiyanın işi daha intensiv və səmərəli olacaqdır.
Qeyd olunmuşdur ki, son vaxtlar ölkələrimiz arasında iqtisadi münasibətlər genişlənməyə başlamışdır. Qarşılıqlı maraq kəsb edən sahələr energetika, turizm, səhiyyə, kənd təsərrüfatı, rabitə və digər istiqamətlərdir. Hökumətlərarası komissiyanın birinci iclasında qəbul olunmuş qərara əsasən Azərbaycanın Kubaya ayıracağı kredit iqtisadi əlaqələrin inkişafında mühüm rol oynayacaqdır.
Kubanın dövlət naziri qeyd etmişdir ki, cari ilin noyabrında Bakıda keçirilməsi planlaşdırılan komissiyanın ikinci iclasınadək görüləcək işləri sürətləndirmək və imzalanacaq sənədləri hazırlamaqla yaxından məşğul olacaqdır.
Görüşdə qarşılıqlı maraq doğuran səhələr barəsində fikir mübadiləsi aparılmışdır.
Həmin gün səfir A.Mehdiyev Kuba xarici işlər nazirinin birinci müavini Bruno Rodriges Parilya ilə də görüşmüşdür.
Görüşdə Azərbaycan ilə Kuba arasında ikitərəfli münasibətlər və beynəlxalq təşkilatlarda əməkdaşlıq məsəsələləri nəzərdən keçirilmişdir.
Qeyd edilmişdir ki, iki ölkə arasında səmimi dostluq münasibətləri mövcuddur və bu, gələcək əməkdaşlıq üçün geniş perspektivlər açır. Azərbaycan hər zaman Kubanı beynəlxalq təşkilatlarda dəstəkləmişdir və öz növbəsində Azərbaycanın ərazi bütövlüyünü və beynəlxalq hüququn prinsiplərinə uyğun mövqeyini Kuba tərəfindən daha qətiyyətlə dəstəklənəcəyini gözləyir.
Bölmənin digər xəbərləri
