SİYASƏT
AZƏRBAYCAN-POLŞA MÜNASİBƏTLƏRİNİN YÜKSƏK SƏVİYYƏYƏ ÇATMASINDA DÖVLƏTLƏRİMİZİN BAŞÇILARININ MÜSTƏSNA XİDMƏTLƏRİ VARDIR
Bakı, 10 mart (AZƏRTAC). Polşa Respublikasının Baş naziri Donald Tuskun başçılığı ilə ölkəmizdə səfərdə olan nümayəndə heyəti martın 10-da Milli Məclisə gəlmişdir.
Polşanın Baş naziri Milli Məclisin iclas zalına baxmışdır.
Sonra Milli Məclisin sədri Oqtay Əsədov ilə Polşanın Baş naziri Donald Tusk arasında görüş olmuşdur.
Milli Məclisin sədri Oqtay Əsədov bu cür yüksək səviyyəli səfərlərin ölkələrimiz arasındakı dostluq münasibətlərinin inkişafına töhfə verdiyini bildirmişdir. Ölkələrimiz arasında əlaqələrin qədim tarixindən danışan O.Əsədov hələ ötən əsrdə polşalı iş adamlarının, neft mütəxəssislərinin Azərbaycanda işlədiklərini, yaşadıqlarını qeyd etmiş, müstəqilliyimizin bərpasından sonra münasibətlərimizin yeni müstəvidə inkişaf etdiyini bildirmişdir. Milli Məclisin sədri demişdir ki, münasibətlərimizin belə yüksək səviyyəyə çatmasında dövlətlərimizin başçılarının müstəsna xidmətləri vardır. Dövlət başçılarının qarşılıqlı səfərləri, keçirdikləri səmərəli görüşlər hər iki tərəfə fayda gətirmiş, əməkdaşlığın inkişafı üçün möhkəm hüquqi baza yaratmışdır.
Ermənistan-Azərbaycan, Dağlıq Qarabağ münaqişəsi barədə ətraflı məlumat verən Oqtay Əsədov demişdir ki, rəsmi Bakı problemin beynəlxalq hüququn norma və prinsipləri əsasında, dövlətlərin ərazi bütövlüyü çərçivəsində həllinə tərəfdardır. Milli Məclisin sədri demişdir: “Bu gün dünyada 1500-dən çox etnik münaqişə mövcuddur. Əgər onların hər birinə dövlət yaratmağa imkan verilsə, o zaman dünyanın siyasi xəritəsi yenidən cızılmalıdır. Azərbaycan öz ərazisində ikinci bir erməni dövlətinin yaradılmasına heç vaxt imkan verməyəcəkdir”.
O.Əsədov münaqişənin həllində nümayiş etdirdiyi mövqeyə, Azərbaycanın ərazi bütövlüyünü daim dəstəklədiyinə görə Polşa dövlətinə və hökumətinə minnətdarlıq etmiş, bu siyasətin gələcəkdə dəyişməyəcəyinə ümidvar olduğunu bildirmişdir.
Milli Məclisin sədri Azərbaycanın Avropanın enerji təhlükəsizliyində oynadığı rolundan danışmış, ölkəmizin Odessa-Brodı-Plotsk-Qdansk layihəsini də dəstəklədiyini qeyd etmişdir.
Azərbaycana səfərindən məmnun qaldığını deyən Donald Tusk bildirmişdir ki, Polşa-Azərbaycan dostluğunun dərin kökləri vardır. O, dost ölkələrimiz arasında əlaqələrin inkişafı üçün bundan sonra da əlindən gələni əsirgəməyəcəyini bildirmişdir.
Ölkəmizin Avropanın enerji təminatında mühüm rolunu vurğulayan Donald Tusk Azərbaycanın son illər əldə etdiyi uğurları yüksək qiymətləndirmişdir. Qonaq demişdir ki, Azərbaycanda əldə olunmuş bütün nailiyyətlər, qlobal maliyyə böhranının ölkəmizə çox az təsir göstərməsi həyata keçirilən düzgün siyasətin nəticəsidir.
Polşanın Baş naziri dövlətlər və xalqlar arasında parlamentlərin rolunu qeyd etmiş, qanunverici orqanların əməkdaşlığını, xüsusilə də dostluq qruplarının fəaliyyətini yüksək dəyərləndirmişdir. Baş nazir Polşa ilə Azərbaycan arasındakı əlaqələrin Avropa İttifaqı, xüsusən də, “Şərq tərəfdaşlığı” proqramı çərçivəsində inkişaf etdirilməsinin vacibliyini qeyd etmişdir. O demişdir ki, Polşa yaxın vaxtlarda Avropa İttifaqına sədrlik edəcək və bu dövrdə Azərbaycan ilə qurum arasında münasibətlərin genişlənməsinə, Azərbaycanın Avropaya inteqrasiyasına xüsusi diqqət yetiriləcəkdir.
Hörmətli qonaq sonda Azərbaycan parlamentinə gələcək fəaliyyətində uğurlar arzulamışdır.
######