AZƏRBAYCAN RESPUBLİKASI BAŞ PROKURORLUĞU MƏTBUAT XİDMƏTİNİN MƏLUMATI
Respublikasında demokratik, hüquqi dövlət quruculuğunun inkişafı, yeni ictimai münasibətlərin formalaşması və cəmiyyətdə sürətlə baş verən mütərəqqi dəyişikliklər ölkə həyatının bütün sahələrində hərtərəfli islahatlar üçün təminatlar yaratmışdır.
Azərbaycan Respublikasının Prezidenti cənab Heydər Əliyevin rəhbərliyi ilə son illər həyata keçirilən məhkəmə-hüquq islahatları nəticəsində demokratik dəyərlərə və dünya standartlarına uyğun qanunlar qəbul olunmuş, peşəkar və təcrübəli hakimlər korpusu formalaşmış, yeni məhkəmə-hüquq sistemi fəaliyyətə başlamışdır.
Cəmiyyətin inkişafı, yeni ictimai münasibətlərə keçid və aparılan demokratikləşmə prosesləri prokurorluğun funksiya və statusuna da yenidən baxılmasını zəruri etmişdir. Bununla əlaqədar qısa müddət ərzində prokurorluğun fəaliyyətini tənzimləyən normativ-hüquqi baza yaradılmış, Konstitusiya prokurorluğun təşkili və fəaliyyət prinsiplərinin statusunu müəyyən etmişdir. İslahatlara uyğun olaraq beynəlxalq standartlara və milli dəyərlərimizə cavab verən “Prokurorluq haqqında” mahiyyətcə yeni Qanun qəbul olunmuşdur.
“Prokurorluq orqanlarında qulluq keçmə haqqında” qanunun və digər qanunların qəbul edilməsi, “Prokurorluğa işə qəbul üçün namizədlərlə müsabiqənin keçirilməsi qaydaları haqqında” Əsasnamənin, Baş Prokurorluğun Kollegiyası tərkibinin, Baş Prokurorluğun strukturunun və ştat vahidləri sayının ölkəmizin Prezidenti tərəfindən təsdiq edilməsi prokurorluğun fəaliyyətinin təkmilləşdirilməsində mühüm mərhələ olmuşdur. Fəaliyyət istiqamətləri üzrə işin düzgün və səmərəli təşkili məqsədi ilə qısa müddət ərzində 60-dan artıq təşkilati və sahələr üzrə əmrlər, əsasnamə və qaydalar hazırlanmışdır.
Prokurorluğun yeni hüquq statusuna müvafiq olaraq aparılmış struktur dəyişiklikləri nəticəsində Baş Prokurorluğun idarə və şöbələrinin sayı 20-dən 12-dək azaldılmış, Azərbaycan Respublikası Prokurorluğunda mövcud ştat vahidlərinin sayı 307 vahid və ya 20 faizdən çox ixtisar edilmişdir. Azərbaycan Respublikası Prokurorluğu mərkəzi aparatının kadr tərkibi 80 faiz yeniləşdirilmiş, peşəkarlıq səviyyəsi ilə seçilən 29 prokurorluq işçisi ilk dəfə olaraq rayon (şəhər) və hərbi prokuror vəzifələrinə irəli çəkilmişdir. Prokurorluq işçisi adına ləkə gətirən, mənəvi və iş keyfiyyətlərinə görə prokurorluqda işləməyə layiq olmayan, vətəndaş hüquqlarının pozulması və qanunsuz yoxlamalar keçirilməsi hallarına yol verən 100-dən çox əməkdaş prokurorluq orqanlarından xaric olunmuşdur.
Aparılan islahatlar nəticəsində Azərbaycan Respublikasının Prokurorluğu qanunun aliliyinə, insan hüquq və azadlıqlarının müdafiəsinə və cinayətkarlığa qarşı mübarizəyə xidmət edən sivil və demokratik bir quruma çevrilmişdir.
Prokurorluq orqanlarının qarşısında duran mühüm və məsuliyyətli vəzifələrin layiqincə yerinə yetirilməsi üçün yüksək peşə hazırlığına və mənəvi keyfiyyətlərə malik prokuror və müstəntiqlər korpusunun formalaşması vacib şərtlərdəndir. Buna nail olmaq üçün qanunvericilik prokurorluğa işə qəbulla əlaqədar namizədlərə bir sıra ciddi tələblər qoymaqla bərabər, onların işə qəbul edilməsinin xüsusi qaydalarını da dəqiq müəyyən etmişdir.
“Prokurorluq orqanlarında qulluq keçmə haqqında” Azərbaycan Respublikası Qanununda ilk dəfə olaraq prokurorluğa işə qəbulun test imtahanları aparılmaqla müsabiqə əsasında həyata keçirilməsi nəzərdə tutulmuşdur. Tələbə Qəbulu üzrə Dövlət Komissiyası ilə əlaqəli şəkildə işə qəbulun demokratik prinsiplərlə, aşkarlıq şəraitində, şəffaf üsullarla, beynəlxalq tələblərə uyğun keçirilməsi prokurorluq orqanlarında həyata keçirilən islahatların mühüm tərkib hissəsi olacaqdır.
Qeyd olunanlara əsasən, Baş Prokurorluq Azərbaycan Respublikası Prezidentinin 2001-ci il 19 iyun tarixli Fərmanı ilə təsdiq edilmiş “Prokurorluğa işə qəbul olunmaq üçün namizədlərlə müsabiqə keçirilməsi qaydaları haqqında” Əsasnaməyə uyğun olaraq prokurorluq orqanlarına ilk dəfə işə qəbul edilmək arzusunda olan şəxslər üçün 60 ştat vahidi üzrə müsabiqə elan edir.
Prokurorluq orqanlarında işə qəbul olunmaq istəyən və qanunvericiliklə müəyyən edilmiş tələblərə cavab verən şəxslər ərizə və sənədlərini Respublika Baş Prokurorluğuna təqdim edə bilərlər. Ərizə və sənədlər Baş Prokurorluğun binasında - Bakı şəhəri, Nigar Rəfibəyli küçəsi 7 nömrəli ünvanda (İndeks 370001) 2002-ci il mayın 31-dən iyunun 30-dək hər gün (bazar günlərindən başqa) saat 9.00-dan 18.00-dək qəbul olunacaqdır.
Müsabiqənin (test imtahanlarının) keçirilməsi vaxtı, imtahan sualları, onların hazırlanmasında istifadə edilmiş qanunların siyahısı və digər məlumatlar barədə əlavə elan veriləcəkdir.
Əlavə məlumat almaq üçün 92-74-32 və 92-54-10 nömrəli telefonlarla müraciət etmək olar.
Müsabiqənin beynəlxalq standartlara uyğun keçirilməsi məqsədi ilə hazırda zəruri təşkilati və digər tədbirlər həyata keçirilməkdədir.
Maraqlananlar “prokurorluğa işə qəbul olunmaq üçün namizədlərlə müsabiqənin keçirilməsi” və “prokurorluğa qulluğa qəbul olunmaq üçün müraciət etmiş şəxslərin sənədlərinin toplanması və yoxlanılması” Qaydaları ilə Baş Prokurorluqda sənədləri qəbul edən komissiyada tanış ola bilərlər.
Bölmənin digər xəbərləri
