Vaşinqton görüşü regionun gələcəyini müəyyən edən siyasi mərhələnin başlanğıcı kimi qiymətləndirilməlidir ŞƏRH
Bakı, 8 avqust, AZƏRTAC
Avqustun 8-i Azərbaycan diplomatiyası və bütövlükdə Cənubi Qafqazın siyasi tarixində dönüş nöqtələrindən biri kimi qiymətləndirilməlidir. 2025-ci ildə Prezident İlham Əliyevin ABŞ-yə tarixi səfəri və Vaşinqtonda Azərbaycan ilə Ermənistan arasında Sülh sazişinin paraflanması regionda uzun illər davam edən qarşıdurmanın aradan qaldırılması istiqamətində yeni mərhələnin əsasını qoyub. Bu uğur Prezident İlham Əliyevin illərlə ardıcıl şəkildə həyata keçirdiyi uzaqgörən xarici siyasətin və milli maraqlara əsaslanan diplomatiyanın məntiqi nəticəsidir.
Bu fikirləri AZƏRTAC-a açıqlamasında YAP Təftiş Komissiyasının sədri, Milli Məclisin deputatı Sevinc Hüseynova söyləyib.
Deputat bildirib ki, Azərbaycan hələ Vətən müharibəsindən dərhal sonra sülh gündəliyini irəli sürən ilk dövlət oldu. Məhz Prezident İlham Əliyevin təşəbbüsü ilə Azərbaycan Ermənistanla münasibətlərin normallaşdırılması üçün beynəlxalq hüquqa söykənən beş əsas prinsip müəyyənləşdirdi. Bu prinsiplər dövlətlərin suverenliyinə və ərazi bütövlüyünə qarşılıqlı hörmət, sərhədlərin toxunulmazlığı, bir-birinə qarşı ərazi iddialarından imtina, güc tətbiq etməmək və kommunikasiyaların açılması kimi fundamental müddəaları özündə ehtiva edir. Bu gün beynəlxalq ictimaiyyət də qəbul edir ki, Cənubi Qafqazda sülh prosesinin müəllifi və əsas təşəbbüskarı Azərbaycandır. Vaşinqtonda keçirilən görüşlər və imzalanan sənədlər məhz bu konsepsiyanın davamı oldu. İmzalanmış sənədlər tərəflər arasında etimadın möhkəmləndirilməsi, sülh müqaviləsinin yekunlaşdırılması, regional əməkdaşlığın genişləndirilməsi və iqtisadi inteqrasiyanın dərinləşdirilməsi baxımından mühüm siyasi və hüquqi baza formalaşdırdı. Həmin prosesdə ABŞ Prezidenti Donald Trampın vasitəçilik səyləri də xüsusi qeyd olunmalıdır. Onun tərəfləri bir masa arxasında toplamaq istiqamətində atdığı addımlar və Prezident İlham Əliyevlə qarşılıqlı məktublaşmaları göstərirdi ki, Vaşinqton regionda davamlı sülhün əldə olunmasını dəstəkləyən əsas beynəlxalq platformalardan birinə çevrilib. Prezident İlham Əliyevin məktublarında Azərbaycanın sülhə sadiqliyi, regionun inkişafı naminə əməkdaşlığa açıq olduğu, lakin milli maraqlar və dövlət suverenliyi məsələsində prinsipial mövqeyindən geri çəkilməyəcəyi aydın şəkildə ifadə olunurdu.
“Bu gün artıq aydın görünür ki, Azərbaycan-Ermənistan münasibətlərinin normallaşması təkcə iki dövlət üçün deyil, bütövlükdə Cənubi Qafqaz üçün yeni iqtisadi, siyasi və təhlükəsizlik imkanları yaradır. Davamlı sülh regionda nəqliyyat-kommunikasiya layihələrinin genişlənməsinə, investisiya mühitinin yaxşılaşmasına, yeni iqtisadi əməkdaşlıq formatlarının yaranmasına və xalqlar arasında etimadın bərpasına xidmət edir.
Bu baxımdan “Beynəlxalq Sülh və Rifah naminə Tramp Marşrutu” layihəsi xüsusi əhəmiyyət daşıyır. Layihə region ölkələri arasında qarşılıqlı əlaqələrin genişləndirilməsi, yeni iqtisadi imkanların formalaşdırılması və Cənubi Qafqazın qlobal nəqliyyat-logistika sistemində rolunun daha da gücləndirilməsi baxımından strateji əhəmiyyətə malikdir. Belə təşəbbüslər bölgənin qarşıdurma məkanı deyil, əməkdaşlıq və inkişaf məkanına çevrilməsinə xidmət edir.
Son altı ildə regionda yaranmış yeni geosiyasi reallıqların müəllifi məhz Prezident İlham Əliyevdir. Azərbaycanın hərbi, siyasi və diplomatik qələbəsi beynəlxalq hüququn bərpasını təmin edib, tarixi ədaləti bərqərar edib və yeni status-kvo formalaşdırıb. Bu status-kvo artıq işğala deyil, beynəlxalq hüquqa, dövlətlərin suverenliyinə və qarşılıqlı əməkdaşlığa əsaslanır.
Prezident İlham Əliyevin həyata keçirdiyi siyasət sübut etdi ki, güclü dövlət, qətiyyətli liderlik və prinsipial diplomatiya sülhə aparan ən etibarlı yoldur. Bu gün Azərbaycan təkcə regionun qalib dövləti deyil, həm də Cənubi Qafqazda sülh gündəliyinin müəllifi, yeni əməkdaşlıq modelinin təşəbbüskarı və sabitliyin əsas təminatçısı kimi çıxış edir. Buna görə də avqustun 8-i yalnız bir diplomatik hadisənin ildönümü deyil, həm də regionun gələcəyini müəyyən edən yeni siyasi mərhələnin başlanğıcı kimi qiymətləndirilməlidir”, - deyə S.Hüseynova bildirib.
Müxbir - Göyçək Mahmudlu
Bölmənin digər xəbərləri
