SİYASƏT
“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin təşkilatçılığı ilə Dövlət Müstəqilliyi Gününə həsr olunmuş konfrans keçirilmişdir
![“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin təşkilatçılığı ilə Dövlət Müstəqilliyi Gününə həsr olunmuş konfrans keçirilmişdir](/files/2013/3/1200x630/14071450424714948367_1200x630.jpg)
Bakı, 18 oktyabr (AZƏRTAC). Oktyabrın 18-də “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi (İB) və Şuşa Rayon İcra Hakimiyyətinin birgə təşkilatçılığı ilə İB-nin mərkəzi qərargahında 18 oktyabr - Dövlət Müstəqilliyi Gününə həsr olunmuş konfrans keçirilmişdir.
AZƏRTAC xəbər verir ki, dövlət himnimizin səslənməsindən sonra konfransı giriş sözü ilə açan “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin rəhbəri, Şuşa Rayon İcra Hakimiyyətinin başçısı Bayram Səfərov Azərbaycanın XX əsrdə iki dəfə müstəqillik əldə etdiyini, suveren dövlətini yaratmaq imkanı qazandığını diqqətə çatdırmışdır. Bildirmişdir ki, 1918-ci ildə qurulmuş Azərbaycan Xalq Cümhuriyyəti cəmi 23 ay yaşamış, 71 il sonra SSRİ-nin süqutu ərəfəsində - 1991-ci il oktyabrın 18-də Azərbaycan Ali Sovetinin sessiyasında “Azərbaycan Respublikasının Dövlət Müstəqilliyi haqqında Konstitusiya Aktı” qəbul olunmuşdur.
Bayram Səfərov demişdir ki, 1991-ci ildən 1993-cü ilin iyununadək hakimiyyətdə olan səriştəsiz qüvvələr respublikadakı ictimai-siyasi, iqtisadi böhranı daha da dərinləşdirmiş, ölkəni idarə olunmaz vəziyyətə gətirmişdilər. Belə bir ağır şəraitdə Azərbaycan xalqı dünya şöhrətli siyasətçi Heydər Əliyevi yenidən ölkə rəhbərliyinə dəvət etdi. Ümummilli lider Heydər Əliyevin hakimiyyətə qayıdışı Azərbaycanı fəlakət və vətəndaş müharibəsi təhlükəsindən, müstəqilliyin itirilməsindən xilas etdi. Ulu öndər Heydər Əliyevin 1993-2003-cü illərdə həyata keçirdiyi məqsədyönlü tədbirlər nəticəsində ölkəmiz stabil inkişaf yoluna qədəm qoymuş, nizami ordu quruculuğunda, respublika həyatının bütün sahələrində dinamik tərəqqi əldə edilmişdir.
Qeyd edilmişdir ki, ulu öndər Heydər Əliyevin əsasını qoyduğu siyasi kurs bu gün Azərbaycan Prezidenti İlham Əliyev tərəfindən çox uğurla davam etdirilir. Müstəqil Azərbaycanın dünya birliyindəki əlaqələri getdikcə daha da genişləndirilir. İcma rəhbəri ötən 22 ildə ölkəmizin böyük, şərəfli və eyni zamanda mürəkkəb bir inkişaf yolu keçdiyini diqqətə çatdırmışdır.
Konfransda çıxış edən Azərbaycan Respublikasının Prezidenti yanında Dövlət İdarəçilik Akademiyasının dosenti, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin analitik-informasiya şöbəsinin müdiri Elçin Əhmədov bildirmişdir ki, ölkəmiz 1991-ci il oktyabrın 18-də dövlət müstəqilliyini bərpa etdikdən sonra yeni siyasi kursun formalaşdırılması və həyata keçirilməsi ən vacib məsələ kimi qarşıda dururdu. O qeyd etmişdir ki, Ermənistanın ölkəmizə qarşı hərbi təcavüzünün qarşısını almaq, işğalın ağır nəticələrini aradan qaldırmaq, ölkəmizin ərazi bütövlüyünü və təhlükəsizliyini təmin etmək, dünya birliyinə siyasi və iqtisadi cəhətdən inteqrasiya olunmaq zərurəti düşünülmüş, ardıcıl və fəal siyasət tələb edirdi. Yalnız 1993-cü ilin ikinci yarısında - ümummilli lider Heydər Əliyevin yenidən hakimiyyətə qayıdışından sonra Azərbaycanın siyasi kursunda mövcud reallıqları nəzərə alan və ölkəmizin milli mənafelərinin qorunmasına yönəlmiş əməli dəyişikliklər edilmişdir. Bu dövrdən başlayaraq həyata keçirilən siyasət məhz Ümummilli Liderin adı və müdrik fəaliyyəti ilə bağlıdır.
E.Əhmədov Ümummilli Liderin müdrik dövlət başçısı və siyasi xadim kimi bu çətin, eləcə də mürəkkəb vəzifələrin öhdəsindən müvəffəqiyyətlə gələrək ölkəmizin sistemli şəkildə dünya birliyinə inteqrasiya olunmasında, ikitərəfli və çoxtərəfli siyasi münasibətlərin genişlənməsi istiqamətində atdığı mühüm addımları bir daha xatırlatmışdır. Bildirmişdir ki, 1993-2003-cü illər ölkəmiz üçün həlledici mərhələ olmuş, məhz həmin dövrdə dövlətçiliyimizin möhkəm təməli qoyulmuşdur. O illərdə Azərbaycanın istər daxili, istərsə də xarici siyasətlə bağlı strateji xətti müəyyən edilmiş, dövlətimiz dünya birliyinə müvəffəqiyyətlə inteqrasiya olunmuşdur.
İctimai Birliyin analitik-informasiya şöbəsinin müdiri ümummilli lider Heydər Əliyevin xarici siyasət kursunu novatorcasına və dinamik şəkildə davam etdirən Azərbaycan Prezidenti İlham Əliyevin yüksək diplomatik fəaliyyəti sayəsində ölkəmizin dünyanın siyasi-iqtisadi mənzərəsini müəyyən edən aparıcı dövlətlərlə və beynəlxalq təşkilatlarla münasibətlərinin keyfiyyətcə yeni müstəvidə daha da inkişaf etdirildiyini vurğulamışdır. O, bu gün Azərbaycanın Cənubi Qafqaz regionunda əsas söz sahibi olan dövlət kimi çətin geosiyasi şəraitdə müstəqil xarici siyasət həyata keçirdiyini diqqətə çatdırmışdır.
Bildirmişdir ki, əsası ümummilli lider Heydər Əliyev tərəfindən qoyulmuş siyasi kursun son on ildə dinamik şəkildə inkişaf etdirilməsi nəticəsində Azərbaycanın çox böyük uğurlara imza atması ölkəmizin dünya birliyində mövqelərinin yüksəlməsini təmin etmiş, bu gün dövlətimiz və xalqımız üçün çox vacib olan problem - işğal olunmuş torpaqlarımızın tezliklə azad ediləcəyinə və ərazi bütövlüyünün bərpa olunacağına olan ümidləri daha da artıraraq perspektivdə Azərbaycanın ən qüdrətli dövlətlər sırasında duracağını şərtləndirmişdir.
Konfransda Şuşa Humanitar Kollecinin müəllimi Afaq Hacıyeva və Şuşa şəhər 12 nömrəli məktəbin tarix müəllimi Elçin Dadaşov dövlət müstəqilliyimizin bərpasından sonra ölkəmizin ictimai-siyasi həyatında baş vermiş mühüm hadisələrdən və hazırda müstəqil Azərbaycanın davamlı inkişafının təmin edilməsindən danışmışlar.
Tədbir Şuşa məktəbləri şagirdlərinin ifasında müstəqilliyimizə, ulu öndər Heydər Əliyevə həsr olunmuş ədəbi-bədii kompozisiyanın təqdim edilməsi ilə başa çatmışdır.