“Dövlət satınalmaları haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2002-ci il 29 yanvar tarixli Fərmanının 1-ci bəndinin 6-cı abzasının icrasını təmin etmək məqsədi ilə Nazirlər Kabineti qərara almışdır ki, “Tenderin nəticələri haqqında tender komissiyasının yekun protokolunun nümunəsi” təsdiq edilsin.

“Tenderin nəticələri haqqında tender komissiyasının protokolunun nümunəsi”nin və “Yekun müqaviləsinin nümunəsi”nin təsdiq edilməsi haqqında” Azərbaycan Respublikası Nazirlər Kabinetinin 2000-ci il 12 may tarixli 87 nömrəli qərarı qüvvədən düşmüş hesab olunmuşdur.

X X X

“Icbari ekoloji sığorta haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2002-ci il 18 aprel tarixli Fərmanının icrasını təmin etmək məqsədi ilə Nazirlər Kabineti qərara almışdır ki, “Zərərli maddələrdən istifadə edən müəssisələr üçün (istehsal, emal, daşınma, saxlama, məhv etmə və sairə) icbari ekoloji sığorta məbləğinə tətbiq edilən Əmsallar” təsdiq olunsun.

X X X

Qazax rayon İcra Hakimiyyətinin Azərbaycan Respublikasının Mədəniyyət Nazirliyi və Azərbaycan Milli Elmlər Akademiyası ilə razılaşdırılmış təklifini nəzərə alaraq, Nazirlər Kabineti qərara almışdır ki, “Respublikada muzey işinin vəziyyəti və onu yaxşılaşdırmaq tədbirləri haqqında” Nazirlər Sovetinin 1970-ci il 30 yanvar tarixli 29 nömrəli qərarına əsasən Qazax rayonunda yaradılmış M.P.Vaqifin xatirə muzeyi “M.P.Vaqif və M.V.Vidadinin xatirə muzeyi” adlandırılsın.

X X X

“Məhkəmə qərarlarının icrası haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2002-ci il 5 mart tarixli Fərmanına uyğun olaraq, Nazirlər Kabineti qərara almışdır ki, “İcra sənədinin verilməsi üçün əsas olan qərarın, habelə qanuna əsasən icra sənədi sayılan sənədin ləğv edilməsi ilə əlaqədar icraata xitam verildikdə, icra hərəkətlərinin həyata keçirilməsi ilə bağlı xərclərin dövlət büdcəsi hesabına ödənilməsi Qaydaları” təsdiq edilsin.

X X X

“Dövlət məhkəmə ekspertizası fəaliyyəti haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2000-ci il 15 yanvar tarixli Fərmanına uyğun olaraq, Nazirlər Kabineti qərara almışdır ki, Azərbaycan Respublikası Səhiyyə Nazirliyinin 1 nömrəli Ruhi Xəstəxanasının məhkəmə-psixiatrik ekspertiza şöbəsinin, güclü və ciddi müşahidə altında psixiatriya stasionarının və adi rejimli məcburi şöbəsinin bazalarında Məhkəmə-Psixiatrik Ekspertiza Mərkəzinin yaradılması haqqında Səhiyyə Nazirliyinin Ədliyyə Nazirliyi və Maliyyə Nazirliyi ilə razılaşdırılmış təklifi qəbul edilsin.

Məhkəmə-Psixiatrik Ekspertiza Mərkəzinin Əsasnaməsi təsdiq olunmuşdur.

Məhkəmə-Psixiatrik Ekspertiza Mərkəzinin ştat vahidlərinin sayı 60 vahid müəyyən edilməli və işcilərin vəzifə maaşları Səhiyyə Nazirliyinin mərkəzi aparatının əməkdaşları üçün tərtib edilmiş əməyin ödənilməsi şərtlərinə və formalarına uyğun müəyyənləşdirilməlidir.

Səhiyyə Nazirliyinə tapşırılmışdır ki, Məhkəmə-Psixiatrik Ekspertiza Mərkəzinin yaradılması və fəaliyyət göstərməsi üçün tələb olunan əlavə xərcləri Səhiyyə Nazirliyinin 2002-ci il üçün təsdiq olunmuş büdcəsi dairəsində həyata keçirilməsini təmin etsin və bu qərardan irəli gələn digər məsələlərin həll edilməsi üçün zəruri tədbirlər görsün.

Azərbaycan Respublikası Nazirlər Sovetinin 1988-ci il 10 noyabr tarixli 398 nömrəli qərarının 2 nömrəli əlavəsinin “Səhiyyə müəssisələri” bölməsinə “Məhkəmə-Psixiatrik Ekspertiza Mərkəzi” sözləri əlavə edilmişdir.

X X X

“Kütləvi informasiya vasitələrinə dövlət qayğısının artırılması haqqında” Azərbaycan Respublikası Prezidentinin 2001-ci il 20 iyul tarixli Fərmanının icrasının təmin edilməsi məqsədi ilə Nazirlər Kabineti qərara almışdır ki, “Kütləvi informasiya vasitələri məhsullarının illik satışından redaksiyaların əldə etdikləri mənfəətdən ödədikləri verginin (reklam gəlirləri istisna olmaqla) miqdarının müəyyənləşdirilməsi və üç il ərzində bu vəsaitin hər il dövlət büdcəsindən redaksiyalara ödənilməsi Qaydaları” təsdiq edilsin.

Həmin qərarlar imzalandığı gündən qüvvəyə minmişdir.

Bu barədə AZƏRTAC-a Nazirlər Kabinetinin mətbuat mərkəzindən məlumat vermişlər.

X X X

“Azərbaycan Respublikasının bəzi qanunvericilik aktlarına dəyişikliklər və əlavələr edilməsi haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2001-ci il 26 dekabr tarixli Fərmanının icrasını təmin etmək məqsədi ilə Nazirlər Kabineti qərara almışdır ki, “Əlillərin, İkinci dünya müharibəsi iştirakçılarının, şəhid ailələrinin, Çernobıl AES-də qəzanın nəticələrinin köçürmə zonasında ləğv edilməsinin iştirakçılarının, eləcə də köçürülmə günü ana bətnində olan uşaqlar da daxil edilməklə, uzaqlaşdırma və köçürülmə zonalarından köçürülmüş uşaqların və ya 18 yaşınadək yeniyetmələrin, habelə 1986-cı il aprelin 26-dan sonra doğulmuş və Çernobıl AES-də qəzanın nəticələrinin ləğv edilməsinin iştirakçısı olmuş, yaxud Çernobıl qəzası nəticəsində zərər çəkmiş və birbaşa radioaktiv şüalanmaya məruz qalmaq ehtimalı olmuş valideynlərin birindən olan uşaqların, valideynlərini itirmiş və valideyn himayəsindən məhrum olmuş uşaqların, fövqəladə hallarda insanların xilas edilməsində və tibbi yardım göstərilməsində iştirak edərkən ziyan çəkmiş vətəndaşların sanatoriya-kurort müalicəsi ilə təmin edilməsi Qaydaları” təsdiq edilsin.

“Hərbi qulluqçuların və onların ailə üzvlərinin (müddətli həqiqi hərbi xidmət hərbi qulluqçularının ailələrindən başqa) sanatoriyalarda və istirahət evlərində sanatoriya-kurort müalicəsi, pansionatlarda və turist bazalarında istirahət üçün putyovkalarla (yollayışlarla) təmin olunması Qaydası” təsdiq olunmuşdur.

Maliyyə Nazirliyinə tapşırılmışdır ki, bu qərarın 1-ci bəndində göstərilmiş şəxslərin sanatoriya-kurort müalicəsinin təşkili üçün Əmək və Əhalinin Sosial Müdafiəsi Nazirliyinə hər il müvafiq olaraq dövlət büdcəsinin və Dövlət Sosial Müdafiə Fondu büdcəsinin layihələrində nəzərə alınmaqla mərkəzləşdirilmiş qaydada vəsait ayrılmasını təmin etsin.

“İşləməyən əlil, pensiyaçı və veteranların respublikanın kurort və sanatoriyalarında müalicə olunmalarını daha səmərəli təşkil etmək tədbirləri haqqında” Nazirlər Kabinetinin 1997-ci il 8 iyul tarixli 74 nömrəli qərarı (ikinci bəndi istisna olmaqla) qüvvədən düşmüş hesab edilmişdir.

X X X

“Narkoloji xidmət və nəzarət haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2001-ci il 17 sentyabr tarixli Fərmanının icrasını təmin etmək məqsədi ilə Nazirlər Kabineti qərara almışdır ki, “İnsan həyatı üçün təhlükə yaradan üsullarla narkoloji xəstələrin müalicəsi Qaydası”, “Narkoloji yardımın həyata keçirilməsi zamanı şəxslər üzərində xüsusi müşahidənin aparılması Qaydası” və “Narkoloji tibb müəssisələrində təhlükəsizlik tədbirlərinin tətbiq edilməsi Qaydası” təsdiq edilsin.

Həmin qərarlar imzalandığı gündən qüvvəyə minmişdir.

Bu barədə AZƏRTAC-a Nazirlər Kabinetinin mətbuat mərkəzindən məlumat vermişlər.