AZƏRBAYCAN SOSİAL RİFAH PARTİYASI “MÜSTƏQİLLİYİMİZİN 18-Cİ İLİ” ADLI TƏDBİR KEÇİRMİŞDİR
Bakı, 15 oktyabr (AZƏRTAC). Oktyabrın 15-də Azərbaycan Sosial Rifah Partiyası (ASRP) Xalq Mətbuat Mərkəzində Dövlət Müstəqilliyi Gününə həsr olunmuş “Müstəqilliyimizin 18-ci ili” adlı tədbir keçirmişdir.
Milli Məclisin deputatlarının, siyasi partiya və qeyri-hökumət təşkilatları təmsilçilərinin iştirak etdiyi tədbirdə Azərbaycanın müstəqillik illərində əldə etdiyi ictimai-siyasi, sosial-iqtisadi uğurlardan danışılmışdır.
ASRP-nin sədri, Milli Məclisin deputatı Xanhüseyn Kazımlı xatırlatmışdır ki, tədbirin keçirildiyi 15 oktyabr günü bizim üçün çox əlamətdardır. Çünki ötən il həmin gün İlham Əliyev ikinci dəfə xalqın böyük əksəriyyətinin (88,73 faiz) etimadını qazanaraq Prezident seçilməklə təkcə ölkə daxilində deyil, həm də onun hüdudlarından kənarda özünü tarixi şəxsiyyət kimi təsdiqləmişdir.
Qeyd edilmişdir ki, ümummilli lider Heydər Əliyevin Naxçıvanda Ali Məclisin sədri işlədiyi illər Azərbaycanın istiqlalı yolunda xüsusi mərhələ olmuşdur. SSRİ-nin saxlanması üçün keçirilən qondarma referendum onun rəhbərliyi altında muxtar respublikada boykot edilmiş, Azərbaycan Xalq Cümhuriyyətinin üçrəngli bayrağı dövlət bayrağı kimi ilk dəfə burada qaldırılmışdır.
Partiya sədri müstəqillik illərində Azərbaycanın bütün sahələrdə əldə etdiyi çoxsaylı uğurlar barədə ətraflı məlumat vermişdir.
Çıxış edənlər müstəqilliyin ilk illərində Azərbaycan xalqının həlli çətin problemlərlə üzləşdiyini və belə bir vaxtda ulu öndər Heydər Əliyevin xalqın çağırışı ilə hakimiyyətə qayıtdığını xatırlatmış, 1991-ci il oktyabrın 18-də əldə etdiyimiz dövlət müstəqilliyinin məhz onun müdrikliyi və siyasi uzaqgörənliyi, yorulmaz fəaliyyəti sayəsində möhkəmləndirildiyini, ölkəmizin ardıcıl inkişaf yolunu tutduğunu vurğulamışlar. Qeyd etmişlər ki, ulu öndər tərəfindən qorunub saxlanılan müstəqilliyimiz bu gün etibarlı əllərdədir.
Bölmənin digər xəbərləri
