Bakı, 24 avqust, AZƏRTAC

Azərbaycan Mərkəzi Asiya ölkələri ilə bütün sferalarda siyasi, iqtisadi, humanitar, mədəni əlaqələrə xüsusi önəm verir. Ölkəmiz türk dövlətləri ilə bir neçə beynəlxalq və regional təşkilatlarda ortaq maraqları əks etdirən birgə diplomatik fəaliyyət gerçəkləşdirir. Bu dövlətlərin içərisində Özbəkistanla strateji münasibətlərin qurulması və daha da inkişaf etdirilməsi istiqamətində dövlət başçıları səviyyəsində mühüm addımlar atılmaqdadır.

Azərbaycanın Özbəkistanla qardaşlıq əlaqələri bütün sovet məkanında bir örnək olub. Fiziki sərhədlərin olmaması iki xalqın arasında iqtisadi, siyasi, ticari münasibətlərin inkişafını gücləndirib.

Azərbaycan-Özbəkistan münasibətləri tarixin və zamanın gerçəkliyi fonunda iki qardaş dövlətin siyasi ənənələrə sadiqliyini bütün dünyaya nümayiş etdirdi. Dövlətlərarası münasibətlər o zaman səmimiyyətə dayana bilər ki, kökündə xalqların birliyi olsun və bu bağları heç bir kənar qüvvə qopara bilməsin.

Bu sözləri AZƏRTAC-a açıqlamasında politoloq Tural Əliyev söyləyib.

Onun sözlərinə görə, Özbəkistan bütün beynəlxalq platformalarda Azərbaycanın haqq səsini dəstəkləyib. Belə ki, bu ölkə İkinci Qarabağ savaşında siyasi, mənəvi cəhətdən Azərbaycanın yanında oldu və bu dəstək indiyə qədər də davam edir. Müharibədən sonra Azərbaycanın Qarabağ və Şərqi Zəngəzur iqtisadi rayonlarında başladığı tikinti-quruculuq, infrastruktur layihələrinə Özbəkistan da öz töhfəsini verib. Füzulidə Özbəkistan Prezidenti Şavkat Mirziyoyevin şəxsi təşəbbüsü ilə tikilən Mirzə Uluqbəyin adını daşıyan məktəbin açılışında dövlətimizin başçısı Qarabağın bərpa işində xarici dövlətin ilk hədiyyəsini qeyd edərək, yüksək dəyərləndirdi.

Dövlət başçıları qarşılıqlı əməkdaşlıq şəraitində iki ölkə arasında iqtisadi, ticari münasibətləri artan xətlə davam etdirmək üçün bütün perspektivləri nəzərdən keçirdiklərini, artıq praktik nəticələri barəsində müsbət irəliləyişlərin olduğunu bəyan etdilər. Yaxın gələcəkdə 500 milyon dollar nizamnamə kapitalı ilə yaradılan Birgə İnvestisiya Fondunun məbləğinin artırılması planlaşdırılır. Energetika, nəqliyyat sahələrində də əlaqələrin inkişaf etdirilməsi qarşıya qoyulmuş məqsədlərdən biridir. Bununla bağlı hökumətlərarası müqavilələr imzalanaraq rəsmiləşdirilir. Xarici işlər nazirləri arasında hərtərəfli strateji tərəfdaşlığın dərinləşməsinə dair “Yol xəritəsi” imzalandı. Azərbaycan ilə Özbəkistan Türk Dövlətləri Təşkilatı, Qoşulmama Hərəkatı və digər təşkilatlarda əməkdaşlıqlarını möhkəmləndirməyə səy göstərirlər.

“Özbəkistan Zəngəzur dəhlizinin açılmasında maraqlı tərəf kimi çıxış edir. Özbəkistan Bakı limanında öz anbar infrastrukturunu yaratmaq niyyətindədir və Mərkəzi Asiya ilə Avropanı birləşdirən bu nəqliyyat-logistika layihələrində paya sahib olmaq istəyir. Həmçinin Orta Dəhlizin mümkün imkanlarından yararlanıb, öz məhsullarını rahat şəkildə daşımaq üçün fəaliyyət konsepsiyası hazırlayır. Bununla da Xəzərə çıxışı olan Çin-Qırğızıstan-Özbəkistan dəmir yolunun tikintisi hesabına Avropa-Asiya daşımaları üzrə marşrut təxminən 1000 kilometrə qədər qısalacaq. Bu marşrut həm Qırğızıstana, həm də Türkmənistan-Azərbaycan vasitəsilə digər Orta Asiya ölkələrinə, eləcə də Avropaya yükdaşımaların təşkilinə böyük töhfə verəcək. Yeni dəmir yolu, eyni zamanda, Orta Asiya üzərindən keçməklə Çinin qərb əyalətlərindən Azərbaycan və Türkiyəyə yükdaşımaları həyata keçirməyə imkan verəcək. Məhz Azərbaycan-Özbəkistan əlaqələri beynəlxalq dəhlizlərin işinə çox böyük töhfə verəcək.

Azərbaycan-Özbəkistan dostluğu iqtisadi, ticari rəqəmlərdən asılı olmayaraq, Türk dünyasının bütövlükdə inkişafına təkan verir. Qarşılıqlı səmimi münasibətlərdə ortaq dil imkanlarının da genişləndirilməsinə gətirib çıxarmaqla bərabər, mədəni, mənəvi əlaqələrin yaxınlaşmasını sürətləndirəcək. Azərbaycan və Özbəkistan liderləri iki xalqın dostluğunu gələcək nəsillərə ötürmək və bu münasibətlərin davam etdirilməsi üçün möhkəm ənənələr yaradıblar”,- deyə T.Əliyev əlavə edib.