Şahzadə Anna xəstəxanadan evə buraxılıb
London, 28 iyun, AZƏRTAC
Böyük Britaniya Kralı III Çarlzın bacısı Şahzadə Anna xəstəxanadan evə buraxılıb.
AZƏRTAC xatırladır ki, 73 yaşlı Şahzadə bazar günü Qlosterşirdəki Qatkomb Parkında yerləşən malikanəsində gəzərkən at onu vurmuş, nəticədə kiçik xəsarətlər və beyin sarsıntısı almışdı.
Şahzadə Anna beş gün xəstəxanada saxlandıqdan sonra, bu gün evə buraxılıb. O, xəstəxana və təcili yardım işçilərinə xidmətlərinə görə dərin minnətdarlığını bildirib.
Qeyd edək ki, Şahzadə xəstəxanada olduğu üçün bu həftə Bukingem Sarayında Yaponiya İmperatorunun şərəfinə təşkil edilən ziyafətdə iştirak edə bilməyib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
