İQTİSADİYYAT
Türkiyə FATF-nin “boz siyahı”sından çıxarılıb
![Türkiyə FATF-nin “boz siyahı”sından çıxarılıb](/files/2024/2/1200x630/17195725562004947034_1200x630.jpg)
Ankara, 28 iyun, AZƏRTAC
“Financial Action Task Force” (FATF) təşkilatı Türkiyəni beynəlxalq maliyyə sisteminin bütövlüyündə çatışmazlıqları olan ölkələrin “boz siyahı”sından çıxarıb.
AZƏRTAC Türkiyə mediasına istinadla xəbər verir ki, bu barədə müvafiq qərar FATF-nin İdarə Heyətinin Sinqapurda keçirilən iclasının yekunları üzrə qəbul edilib.
Türkiyə ilə yanaşı, Yamayka da FATF-nin “boz siyahı”sından çıxarılıb.
Türkiyənin Maliyyə Nazirliyinin rəhbəri Mehmet Şimşek sosial şəbəkələrdə Qrupun İdarə Heyətinin qərarını şərh edərək deyib: “Biz buna nail olduq!”
Türkiyənin vitse-prezidenti Cevdet Yılmaz isə bildirib ki, ölkənin FATF-nin “boz siyahı”sından çıxarılması Türkiyə hökumətinin iqtisadi kursuna beynəlxalq etimadın göstəricisi və xarici investisiyaların artmasının stimuludur.
Ankara təşkilata 1991-ci ildə qoşulub və 2021-ci ildən Qrupun “boz siyahı”sında yer alıb.
FATF 1989-cu ildə yaradılıb və çirkli pulların “yuyulması” və terrorizmin maliyyələşdirilməsi ilə mübarizə sahəsində qlobal standartları işləyib hazırlayan, həmçinin milli sistemlərin bu standartlara uyğunluğunu qiymətləndirən hökumətlərarası təşkilatdır.
AZƏRTAC-ın xüsusi müxbiri
Ankara