AZƏRBAYCANDA SƏUDİYYƏ ƏRƏBİSTANI KRALLIĞININ MƏDƏNİYYƏT GÜNLƏRİ BAŞLAMIŞDIR
AZƏRTAC xəbər verir ki, iyunun 17-də Müslüm Maqomayev adına Azərbaycan Dövlət Filarmoniyasında Azərbaycan Respublikasında Səudiyyə Ərəbistanı Krallığının Mədəniyyət Günlərinin açılışı olmuşdur.
Mədəniyyət və Turizm naziri Əbülfəs Qarayev çıxış edərək bildirmişdir ki, mədəniyyət günləri çərçivəsində keçiriləcək tədbirlər iki ölkə arasında mədəni əməkdaşlığın möhkəmlənməsinə yeni təkan verəcəkdir.
Səudiyyə Ərəbistanı Krallığının Mədəniyyət və İnformasiya naziri İyad İbn Əmin Əl-Mədən Azərbaycanda hər sahədə nəzərəçarpan sürətli inkişafdan məmnunluğunu bildirmişdir. Tədbirin əhəmiyyətindən danışan nazir vurğulamışdır ki, bir həftə davam edəcək mədəniyyət günləri çərçivəsində Krallığın tanınmış musiqi və rəqs qrupları konsertlər verəcək, tanınmış rəssamların əsərlərindən ibarət sərgilər açılacaqdır.
Qonağa milli Azərbaycan xalçası hədiyyə edilmişdir.
Tədbirin sonunda Səudiyyə Ərəbistanı Krallığının tanınmış mədəniyyət ustaları maraqlı konsert proqramı ilə çıxış etmişlər.
######
Bölmənin digər xəbərləri
