Bakı, 6 avqust (AZƏRTAC). Azərbaycanın kişi otüstü xokkeyçilərdən ibarət komandası Avstriyanın paytaxtı Vyanada Avropa çempionatının II divizyonunda yüksək dəstəyə iki vəsiqədən birini qazanmaq uğrunda mübarizə aparır.

Azərbaycan Otüstü Xokkey Federasiyasından AZƏRTAC-a bildirmişlər ki, yarışın “A” qrupunda yer alan kişi xokkeyçilərimiz ilk turda Şotlandiya yığmasını 3:0 hesabı ilə məğlub etmişlər. Matçın birinci hissəsində hesabı açan həmyerlilərimiz fasiləyə 1:0 hesabı ilə çıxmışlar. İkinci hissədə rəqib qapısından daha 2 cavabsız qol keçirən millimiz ilk görüşdə pərəstişkarlarını sevindirməyi bacarmışdır.