AZƏRBAYCANIN VƏ İRANIN KƏND TƏSƏRRÜFATI NAZİRLƏRİ BİRGƏ ƏMƏKDAŞLIQ MƏSƏLƏLƏRİNİ MÜZAKİRƏ ETMİŞLƏR
AZƏRTAC-ın xüsusi müxbir xəbər verir ki, iyunun 15-də Azərbaycanın kənd təsərrüfatı naziri İsəmət Abasov iranlı həmkarı Məhəmmədrza İskəndərinin dəvətilə İrana səfərə gəlmişdir.
İranın Kənd Təsərrüfatı Naziri ilə keçirilən görüşdə İsmət Abasov Azərbaycanda həyata keçirilən aqrar islahatlar, əldə olunan uğur və nailiyyətlər barədə ətraflı məlumat vermiş, kənd təsərrüfatının inkişafı ilə əlaqədar bir sıra dövlət proqramlarının qəbul olunduğunu bildirmiş, Prezident İlham Əliyev bu sahəyə böyük diqqət göstərdiyini xüsusi qeyd etmişdir.
Tərəflər kənd təsərrüfatı sahəsində birgə əməkdaşlığa dair geniş fikir mübadiləsi aparmış, aqrar bölmənin inkişafı üçün kifayət qədər geniş və səmərəli imkanların mövcud olduğunu bildirmişlər.
Sonra Azərbaycan nümayəndə heyəti Kərəc şəhərindəki “Razi” quşçuluq və heyvandarlıq sahələri üçün dərman istehsal edən elmi-tədqiqat müəssisəsi və bio-texnologi şirkətin fəaliyyətilə maraqlanmışlar.
İyunun 18-dək davam edəcək səfər çərçivəsində nümayəndə heyətimiz Ərdəbil vilayətində kənd təsərrüfatı sahələrinə baş çəkəcək, istehsal kompleksləri ilə tanış olacaqdır.
Bölmənin digər xəbərləri
