AZƏRBAYCANLI ALİM GÜRCÜSTANIN GELATİ AKADEMİYASININ ÜZVÜ SEÇİLMİŞDİR
AZƏRTAC-ın xüsusi müxbiri xəbər verir ki, Azərbaycan Respublikası Milli Elmlər Akademiyasının İnsan Hüquqları üzrə Elmi-Tədqiqat İnstitutunun direktoru, professor Rövşən Mustafayev Gürcüstanın ən qədim akademiyasının - XII əsrdə təşkil olunmuş Gelati Akademiyasının üzvü seçilmiş və fəxri diplomuna layiq görülmüşdür.
Mayın 23-də Tbilisidə bu məqsədlə keçirilən mərasimdə Gelati Akademiyasının üzvü seçilməsi ilə bağlı sənədləri alimə Ümumgürcüstan Katolikos Patriarxı II İlya təqdim etmişdir.
Təqdimetmə mərasimində çıxış edən II İlya demişdir ki, mən Azərbaycanın tarixinə və mədəniyyətinə yaxşı bələdəm və ona heyranam. Bugünkü tədbiri iki qonşu xalqın tarixi dostluğunun daha bir nümunəsi kimi qiymətləndirən Ümumgürcüstan Katolikos Patriarxı Azərbaycan Prezidenti İlham Əliyevə ən xoş arzularını çatdırmışdır. O, ölkələrimiz arasında münasibətlərin getdikcə yaxşılaşmasından məmnunluq duyduğunu ifadə etmiş, dar gündə də, xoş gündə də həmişə birgə olan Azərbaycan və Gürcüstanın böyük uğurlar qazanacağına əmin olduğunu vurğulamışdır.
II İlya demişdir ki, azərbaycanlı alim bu yüksək etimada insan hüquqlarının müdafiəsi məsələsinin dərindən bilicisi kimi layiq görülmüşdür.
Rövşən Mustafayev yüsək etimada görə, Ümumgürcüstan Katolikos Patriarxı II İlyaya, Gelati Akademiyasının rəhbərliyinə minnətdarlıq etmişdir.
Təqdimat mərasimində Azərbaycanın Gürcüstandakı səfiri Namiq Əliyev iştirak etmişdir.
Bölmənin digər xəbərləri
