Azərbaycanlı deputat Avropa Parlamentinin üzvlərinin sayıqlamalarına tutarlı cavab verib
Roma, 19 sentyabr, AZƏRTAC
Avropa Parlamentinin üzvü Fabio Massimo Kastaldo və həmkarlarının Avropa Komissiyası rəsmilərinə ünvanladığı məktubdakı əsassız iddialarına cavab olaraq Milli Məclisin Azərbaycan-İtaliya parlamentlərarası əlaqələr üzrə işçi qrupunun sədri, deputat Azər Kərimlinin İtaliyanın “Agenzia Nova” informasiya agentliyində məqaləsi dərc edilib.
AZƏRTAC xəbər verir ki, deputat məqaləsində Avropa Parlamentinin üzvlərinə Azərbaycanda “Dağlıq Qarabağ” adlanan inzibati ərazi vahidinin olmadığını xatırladıb. Qeyd edib ki, Fabio Massimo Kastaldonun təcavüzkar və silahlı separatizmi təbliğ edən kiçik qrupların iddialarına uyğun olaraq Azərbaycanda yaşayan ermənilərin məskunlaşdıqları əraziyə “Dağlıq Qarabağ” adını verməsi separatizmi dəstəkləmək məqsədilə ölkəmizin suveren ərazilərinin rəsmi adlarının qəsdən təhrif edilməsidir. Kastaldonun ölkəmizin 2020-ci ildə Azərbaycan, Ermənistan və Rusiya liderləri tərəfindən imzalanan üçtərəfli Bəyanatın müddəalarına əməl etməməsi ilə bağlı şərhləri reallığı əks etdirmir. Əksinə, Ermənistan həmin üçtərəfli Bəyanata uyğun olaraq üzərinə götürdüyü bütün hərbi qüvvələrinin Azərbaycan ərazilərindən çıxarılması, habelə Azərbaycanı ilə onun eksklavı olan Naxçıvan Muxtar Respublikası arasında maneəsiz əlaqəni təmin etmək üçün dəhlizin yaradılması kimi öhdəliklərini hələ də yerinə yetirməyib. Eyni zamanda, Azərbaycanın suveren ərazisində beynəlxalq səviyyədə tanınmış yollardan biri olan Laçın yolunun “Laçın dəhlizi” adlandırılması ölkəmizdə yaşayan ermənilərin məskunlaşdığı ərazinin eksklav kimi təqdim olunmasına xidmət edir və bu da Azərbaycanın ərazi bütövlüyünün şübhə altına alınması deməkdir.
Deputat Azərbaycan ərazisindən keçən Ağdam-Xankəndi yolunun hazırda yüklərin daşınması üçün açıq olduğunu, Rusiya Qızıl Xaç Cəmiyyətinin ölkəmizdə yaşayan ermənilərə humanitar yüklərin çatdırılmasını təmin etdiyini bildirib. Əlavə edilib ki, Fabio Massimo Kastaldonun Azərbaycanda erməni əsilli sakinlərin sayı ilə bağlı təqdim etdiyi məlumatlar bir neçə dəfə şişirdilib. Azərbaycan çoxmillətli və çoxkonfessiyalı ölkə olduğu üçün burada yaşayan insanların sayı milliyyətinə görə deyil, vətəndaşlıq statusuna görə müəyyən edilir.
A.Kərimli Azərbaycanın suveren ərazilərinin 20 faizinin 30 ilə yaxın müddət ərzində Ermənistan tərəfindən işğal edildiyini, işğal dövründə yaşayış yerləri, dini, mədəni, tarixi abidələr tamamilə dağıdıldığını və ərazilər minalandığını xatırladıb. Qeyd edib ki, Ermənistanın işğalından sonra bir milyondan çox azərbaycanlı öz yurd-yuvasından didərgin düşüb və onların əksəriyyəti hələ də geri qayıda bilməyib. İki yüz mindən çox azərbaycanlı hazırkı Ermənistan ərazisindən zorla deportasiya olunub və Azərbaycana sığınmağa məcbur edilib.
“Kastaldonun “Dağlıq Qarabağ” adlandırdığı ərazi Azərbaycanın Qarabağ iqtisadi rayonunun kiçik bir hissəsidir. Düzünü desəm, bir dövlətin öz ərazisini işğal etməyə hazırlaşdığı iddiası qədər gülünc ifadəyə rast gəlməmişəm. Onu da əlavə etmək istərdim ki, Avropa İttifaqı Şurasının Prezidenti Şarl Mişelin vasitəçiliyi ilə Azərbaycan Prezidenti və Ermənistanın baş naziri arasında bir neçə görüş keçirilib. Həmin görüşlərdə Ermənistan Qarabağın Azərbaycanın bir hissəsi olduğunu və ölkəmizin ərazi bütövlüyünü tanıdığını bəyan edib. Belə ki, Kastaldonun Azərbaycan-Ermənistan münasibətlərinin normallaşması prosesinə maneə yaratmaq cəhdləri tamamilə anlaşılmazdır. Bu cür yanaşmalar Cənubi Qafqazda sülh və təhlükəsizliyin təmin edilməsinə deyil, insanları parçalamağa, milli zəmində düşmənçiliyi qızışdırmağa xidmət edir”, - deyə A.Kərimli vurğulayıb.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
