AZƏRBAYCANLI GƏNCLƏRİN ALMANİYADA TƏHSİL ALMALARI ÜÇÜN MÜQAVİLƏ İMZALANMIŞDIR
AZƏRTAC xəbər verir ki, azərbaycanlı gənclərin Almaniyanın nüfuzlu ali məktəblərində təhsil almaları üçün Təhsil Nazirliyi ilə Alman Akademik Mübadilə Təşkilatı (DAAD) arasında müqavilə imzalanmışdır.
Bu münasibətlə Təhsil Nazirliyində keçirilən görüşdə DAAD-ın vitse-prezidenti Maks Huber demişdir ki, Azərbaycan dövlətinin təhsilə qayğısı, gənclərin xarici ölkələrdə təhsil almaları ilə bağlı xüsusi Proqramın təsdiqi xalqın xoşbəxt gələcəyinə yönəldilmişdir. Prezident İlham Əliyevin bu uzaqgörən siyasəti bir neçə ildən sonra bəhrəsini verəcəkdir.
Təhsil naziri Misir Mərdanov demişdir ki, bu müqavilə azərbaycanlı gənclərin xarici ölkələrdə təhsili ilə bağlı dövlətimizin başçısının imzaladığı Proqramın tərkib hissəsidir.
Bildirilmişdir ki, hər il 60-70 azərbaycanlı Alman Akademik Mübadilə Təşkilatının müxtəlif proqramlarında iştirak edir. İmzalanan müqavilə gənclərimizin Almaniya universitetlərində təhsil almalarını rəsmiləşdirən sənəddir.
M.Mərdanov söyləmişdir ki, ixtisaslar, istiqamətlər, ali məktəblərin siyahısı və s. şərtlər Nazirlər Kabinetinin təsdiqlədiyi qərarda əksini tapmışdır. İlk dəfə olduğuna və Almaniyada sənəd qəbulu artıq başladığına görə, bu il yalnız 20 nəfər ərizə vermişdir. İmtahan iyunun 17-də azərbaycanlı və alman ekspertlərin iştirakı ilə keçiriləcəkdir. Sənəddə əksini tapan ixtisaslar Azərbaycan üçün aktualdır.
Azərbaycanlı gənclərin xarici ölkələrdə təhsilini Dövlət Neft Şirkəti maliyyələşdirəcəkdir.
Maks Huber Prezident İlham Əliyevin neftdən gələn gəlirlərin insan kapitalına yönəldilməsi ilə bağlı siyasətini və bu istiqamətdə görülən işləri yüksək qiymətləndirmiş, ölkələrimiz arasında təhsil və elm sahəsində əməkdaşlığın həm də vətəndaş əlaqələrinin inkişafına kömək edəcəyini bildirmişdir.
Bölmənin digər xəbərləri
