İQTİSADİYYAT
Bakı qəsəbələrində sahibkarların investisiya layihələrinin güzəştli qaydada maliyyələşdirilməsi davam etdirilir
Bakı, 31 yanvar (AZƏRTAC). Yanvarın 31-də Sahibkarlığa Kömək Milli Fondu Xəzər rayonunun Binə qəsəbəsində “Sahibkarlığın inkişafına dövlət dəstəyi” mövzusunda tədbir keçirmişdir.
İqtisadiyyat və Sənaye Nazirliyinin mətbuat xidmətindən AZƏRTAC-a bildirmişlər ki, 60-a yaxın sahibkarın iştirak etdiyi tədbir çərçivəsində sahibkarlarla Xəzər rayonunun iqtisadi potensialının reallaşdırılması istiqamətində müzakirələr aparılmış, rayonda prioritet hesab olunan müasir çörək zavodunun, ət kəsimi müəssisəsinin, kiçik və orta həcmli istixana təsərrüfatlarının yaradılması üzrə nümunəvi investisiya layihələrinin təqdimatı keçirilmişdir. Sahibkarlara nümunəvi layihələr və metodiki materiallar paylanmışdır.
Tədbirdə çıxış edən Xəzər Rayon İcra Hakimiyyəti başçısının müavini Lalə Əhmədova və nazirliyin sahibkarlığın inkişafı siyasəti şöbəsinin müdiri Zaur Qasımov Bakı şəhərinin və onun qəsəbələrinin sosial-iqtisadi inkişafına dair qəbul edilmiş dövlət proqramları çərçivəsində Xəzər rayonunda da uğurlu infrastruktur layihələrinin həyata keçirildiyini, kommunal və sosial xidmətlərin həcminin və keyfiyyətinin yaxşılaşdığını, abadlıq işlərinin geniş vüsət aldığını, sahibkarlıq fəaliyyətinin genişləndiyini, əhalinin həyat səviyyəsinin yüksəldiyini bildirmişlər.
Sahibkarlığa Kömək Milli Fondunun icraçı direktoru Şirzad Abdullayev “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın icrası istiqamətində Fond tərəfindən görülmüş işlər barədə ətraflı məlumat vermişdir. Qeyd edilmişdir ki, Dövlət Proqramının icrası dövründə 680 sahibkarlıq subyektinin investisiya layihəsinin maliyyələşdirilməsinə 148,2 milyon manat güzəştli kredit verilmişdir. Bu kreditlər 5300-ə yaxın yeni iş yerinin açılmasına imkan yaradır. Həmçinin Sahibkarlığa Kömək Milli Fondu tərəfindən müasir texnologiyaların tətbiqinə əsaslanan 53 iri layihə, o cümlədən 13 çörək zavodu, 13 istixana kompleksi, 9 quşçuluq təsərrüfatı, 2 ət emalı fabriki, 2 metal konstruksiya müəssisəsi və 14 digər sənaye müəssisəsi maliyyələşdirilmişdir. 2014-cü ilin ötən dövrü ərzində isə respublika üzrə 277 sahibkara 9,3 milyon manat güzəştli kredit ayrılmışdır ki, bu layihələrin reallaşdırılması 600-dən çox yeni iş yerinin yaradılmasına imkan verir. Şirzad Abdullayev “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” üzrə Fond tərəfindən həyata keçiriləcək tədbirlər barədə də danışmışdır.
Binə qəsəbəsində keçirilən tədbir çərçivəsində müvəkkil kredit təşkilatları vasitəsilə 12 sahibkarlıq subyektinə 3,1 milyon manat kredit verilmişdir. Əsasən, heyvandarlıq, tərəvəzçilik, logistik xidmət və digər sahələrin inkişafına yönəldiləcək, bu kreditlərin reallaşdırılması 100-ə yaxın yeni iş yerinin açılmasına imkan yaradır.
“Sahibkarlığın inkişafına dövlət dəstəyi” tədbiri çərçivəsində Binə qəsəbəsində ildə 9 min ton tərəvəz məhsulları istehsal edən və 5,6 milyon şitil yetişdirilən müasir istixana komplekslərinin fəaliyyətinə baxış keçirilmişdir.