İQTİSADİYYAT
Bakı-Tbilisi-Qars dəmir yolunun Gürcüstan sahəsinin tikintisinə baxış keçirilmişdir
Tbilisi, 8 mart (AZƏRTAC). “Marabda-Kartsax” ASC, “Azərdəmiryolservis”, “Azəryolservis” və “Azərinşaatservis”in Gürcüstan nümayəndəliyinin rəhbərləri martın 8-də Bakı-Tbilisi-Qars (BTQ) dəmir yolunun Gürcüstan sahəsində işlərin gedişinə baxış keçirmişlər.
Nümayəndələr Samtsxe-Cavaxeti bölgəsinin Axalkalaki rayonunda tikilən stansiyanın inşası ilə tanış olmuş və qeyd etmişlər ki, burada hökm sürən çətin iqlim şəraitinə baxmayaraq, işlər qrafik üzrə aparılır. BTQ layihəsində ən böyük körpü - Axalkalaki rayonu ərazisində inşa olunan “Qırxbulaq” körpüsünün tikintisi də nəzərdən keçirilmişdir. Körpünün uzunluğu 162, eni isə 9 metrdir. Baxış iştirakçıları burada da işin gedişindən razı qalmışlar. Kartsax stansiyasında da işin qənaətbəxş aparıldığı qeyd olunmuş və bildirilmişdir ki, tikinti işləri nəzərdə tutulan vaxtda başa çatdırılacaq, 2012-ci ilin sonunda bu yolla ilk qatar Türkiyə sərhədinədək yola salınacaqdır.
İslam Əliyev
AZƏRTAC-ın xüsusi müxbiri
Tbilisi