İDMAN
Bakı yelkənli qayıqların 470 Olimpiya sinfi üzrə 2016-cı ildə keçiriləcək dünya çempionatına ev sahibliyi edəcək
![Bakı yelkənli qayıqların 470 Olimpiya sinfi üzrə 2016-cı ildə keçiriləcək dünya çempionatına ev sahibliyi edəcək](/files/2014/3/1200x630/1410186192154853979_1200x630.jpg)
Azərbaycan Yelkənli Qayıq İdmanı Federasiyasının mətbuat xidmətindən AZƏRTAC-a bildiriblər ki, Yunanıstanın Afina şəhərində yelkənli qayıqların 470 Olimpiya sinfi üzrə Beynəlxalq Assosiasiyanın Baş Assambleyası keçirilib. Assambleya çərçivəsində yelkənli qayıqların 470 Olimpiya sinfi üzrə 2016-cı ildə təşkil olunacaq dünya çempionatına ev sahibliyi edəcək ölkənin müəyyənləşdirilməsi məqsədilə səsvermə keçirilib.
Assambleyada 254 səs çoxluğu ilə Azərbaycanın yelkənli qayıqların 470 Olimpiya sinfi üzrə 2016-cı ildə keçiriləcək dünya çempionatına ev sahibliyi etməsi barədə qərar qəbul olunub.
Afina şəhərində keçirilmiş Assambleya çərçivəsində Azərbaycan Yelkənli Qayıq İdmanı Federasiyasının nümayəndələri təqdimat keçiriblər.
Mötəbər beynəlxalq tədbirlərin keçirilməsində böyük təcrübəsi olan ölkəmizin paytaxtı, daim yenilən, müasirləşən və xüsusilə də küləklər şəhəri olan Bakının yelkənli qayıqların 470 Olimpiya sinfi üzrə 2016-cı ildə keçiriləcək dünya çempionatına ev sahibliyi etməsinin doğru seçim olduğu Beynəlxalq Yelkənli Qayıq İdmanı Federasiyasının nümayəndələri və Assambleyanın iştirakçıları tərəfindən xüsusilə vurğulanıb.
Yelkənli qayıqların 470 Olimpiya sinfi iki əllə idarə olunan yarış qayıqlarıdır. Bu sinfin adı onun ümumi uzunluğunun santimetrlə ölçüsündən yaranıb (qayıq 4.70 metr uzunluğundadır). Bu qayıqlar sürətli üzmə qabiliyyətinə malikdirlər. 470 Olimpiya sinfinə aid olan həmin qayıqların çəkisinə nisbətən iri həcmli yelkənləri vardır ki, bu da qayıqların avtomobillərlə müqayisədə sanki dəniz avtomobili kimi dənizdə yüksək sürətlə və manevrlə idarə olunmasına şərait yaradır.
Bu idman növü 1976-cı ildən Olimpiya sinfinə daxil edilmiş 10 yelkənli qayıqlar üzrə idman növündən biridir. Üç yüz nəfərdən çox idmançının iştirak etdiyi bu idman növü üzrə yarışlar dənizdə keçirilən ən böyük yarışlardan biri hesab olunur.
Ölkəmizin belə bir beynəlxalq səviyyəli, mötəbər yarışa ev sahibliyi etməsinin Azərbaycan Prezidenti İlham Əliyev tərəfindən böyük zəhmət və qayğı ilə respublikamızın beynəlxalq idman aləmində formalaşdırılmış nüfuzunun daha da artırılması istiqamətində həyata keçirilən məqsədyönlü tədbirlərin tərkib hissəsi olması qürur hissi ilə vurğulanmalıdır.