BAKIDA AVROPA ENERJİ XARTİYASININ SƏNAYE MƏŞVƏRƏT QRUPUNUN İCLASI KEÇİRİLMİŞDİR
Azərbaycan Respublikası Dövlət Neft Şirkətindən (ARDNŞ) AZƏRTAC-a bildirmişlər ki, Bakıda Avropa Enerji Xartiyasının Sənaye Məşvərət Qrupunun iclası keçirilmişdir.
Bu, qrupun Avropa Enerji Xartiyasının Brüsseldəki ofisindən kənarda keçirdiyi ilk iclasdır və ölkəmizin beynəlxalq aləmdə qədim neft ölkəsi və əhəmiyyətli layihələrə sahiblik edən bir dövlət kimi dəyərləndirilməsinin nəticəsidir.
“bp” şirkətinin Avropa dövlətləri ilə iş üzrə direktoru, Sənaye Məşvərət Qrupunun sədri Horvard Çazsın sədrlik etdiyi iclasda cari məsələlərin müzakirəsindən əlavə, ARDNŞ-nin, Türkiyənin “Botaş” və Rusiyanın RAO EES şirkətlərinin məlumatları dinlənilmişdir. ARDNŞ prezidentinin müşaviri Murad Heydərovun təmsil etdiyi qurumun çoxşaxəli fəaliyyətindən bəhs edən çıxışı tədbir iştirakçıları tərəfindən böyük maraqla qarşılanmışdır.
İclasda bildirilmişdir ki, bu il martın 11-12-də ARDNŞ-nin dəstəyi ilə Bakıda Enerji Xartiyasının “Neftin və qazın qiymətinin və tranzit tariflərinin formalaşmasının beynəlxalq mexanizmləri” mövzusunda keçirilmiş seminarının yüksək səviyyədə təşkili Enerji Xartiyası Katibliyinin diqqətini cəlb etmiş və bununla əlaqədar ARDNŞ prezidenti Rövnəq Abdullayevin adına təşəkkür məktubu göndərilmişdir.
İclas iştirakçıları Azərbaycanın Avropa Enerji Xartiyasının Sənaye Məşvərət Qrupundakı təmsilçisi, ARDNŞ-nin Elm və texnika şöbəsinin rəisi Nazim Vəliyevin müşayiəti ilə regionun ən böyük neft-qaz terminalı olan Səngəcal terminalına baş çəkmiş və bu nəhəng obyektin işi ilə yaxından tanış olmuşlar.
Qeyd edək ki, Avropa Enerji Xartiyası 1991-ci il dekabrın 17-də imzalanmışdır. Xartiyanın əsas məramı enerji sahəsində beynəlxalq əməkdaşlığın inkişaf etdirilməsi və enerji təchizatının etibarlığının möhkəmləndirilməsi sahəsində qarşılıqlı səmərəli fəaliyyətin əlaqələndirilməsidir.
Bölmənin digər xəbərləri
