İQTİSADİYYAT
Bakıda Azərbaycan-Böyük Britaniya əməkdaşlığı üzrə Forum keçirilib
AZƏRTAC xəbər verir ki, Forumu giriş nitqi ilə açan Azərbaycan Respublikası Dövlət Neft Şirkətinin (ARDNŞ) ekologiya üzrə vitse-prezidenti Rəfiqə Hüseynzadə Azərbaycan və Böyük Britaniya arasında əlaqələrin, xüsusilə də enerji sahəsində əməkdaşlığın daha da dərinləşməsi baxımından tədbirin əhəmiyyətini qeyd edib. Böyük Britaniyanın bp şirkəti ilə qarşılıqlı münasibətlərin 20 illik tarixindən söhbət açan ARDNŞ-in vitse-prezidenti ötən müddət ərzində birgə yaradılmış neft və qaz ixrac boru kəmərləri sisteminin əhəmiyyətini vurğulayıb. Bildirilib ki, Azərbaycan bu gün dünyanın 30-dan çox ölkəsinə neft və neft məhsulları ixrac edir. Azərbaycanla Böyük Britaniya arasında enerji sahəsində əməkdaşlığın dərinləşməsində SOCAR-la bp arasındakı məhsuldar və səmərəli münasibətlər əhəmiyyətli rol oynayır.
R.Hüseynzadə bu il sentyabrın 20-də Bakıda “Cənub” qaz dəhlizinin təməlqoyma mərasinin keçirildiyini xatırladaraq bu layihənin Xəzər regionundan Avropaya yeni enerji dəhlizi açacağını və bu qitənin enerji təhlükəsizliyində mühüm rol oynayacağını diqqətə çatdıraraq deyib: “Bu tarixi layihə çərçivəsində bp-nin Azərbaycan ilə birlikdə olması, eyni zamanda iştirak payının artırılması strateji əməkdaşlığa verdiyimiz önəmin daha bir göstəricisidir”.
Bu günədək SOCAR-ın maliyyə vəsaiti hesabına 100-dən artıq Azərbaycanlı tələbənin Böyük Britaniyanın nüfuzlu universitetlərində təhsil alığını deyən R.Hüseynzadə Bakı Ali Neft Məktəbi ilə Britaniyanın Heriot-Watt universitetinin müasir biliklərə malik mühəndis kadrları hazırlığı sahəsində əməkdaşlığını yüksək dəyərləndirib.
Sonra “Əsrin müqaviləsi” haqqında film nümayiş etdirilib.
Forumda çıxış edən Azərbaycanın Böyük Britaniya və Şimali İrlandiya Birləşmiş Krallığındakı fövqəladə və səlahiyyətli səfiri Tahir Tağızadə Azərbaycan və Böyük Britaniya arasında ikitərəfli münasibətlərin yüksələn xətlə inkişaf etdiyini deyib. Səfir ötən həftə Londonda Birləşmiş Krallığın Enerji Sənayesi Şurası tərəfindən “Azərbaycan neft və qaz sənayesi: cari layihələr, perspektivlər və yerli biznesin inkişafı” mövzusunda keçirilən biznes-seminarın, eləcə də bu Forumun əməkdaşlığın inkişafına təkan verəcəyinə əminliyini ifadə edib.
Böyük Britaniya Baş nazirinin ticarət üzrə səfiri, Lordlar Palatasının üzvü Lord Risbi ölkəsi ilə Azərbaycan arasında bütün sahələrdə, xüsusən də neft və qaz sahəsində əlaqələrin əhəmiyyətini vurğulayıb. Azərbaycanın iştirakı və birbaşa təşəbbüsü ilə həyata keçirilən “Cənub” qaz dəhlizi, “Şahdəniz-2”, Trans-Adriatik (TAP) və Trans-Anadolu (TANAP) boru kəmərləri layihələrinin Avropanın enerji təhlükəsizliyinin təminatına böyük töhfələr verəcəyini bildirən Lord Risbi bp şirkəti ilə SOCAR arasındakı 20 illik tarixə malik əlaqələri yüksək qiymətləndirib.
Milli Məclisin deputatı Muxtar Babayev, Böyük Britaniyanın Nümayəndələr Palatasının üzvü Ceyms Varton, “bp Azerbaijan” şirkətinin əlaqələr, xarici işlər və təhlükəsizlik üzrə vitse-prezidenti Hüseyn Məmmədov çıxış edərək Forumun əhəmiyyətindən danışıblar.
Sonra müzakirələr aparılıb, iştirakçıları maraqlandıran suallar cavablandırılıb və brifinqlər keçirilib.