ELM VƏ TƏHSİL
BAKIDA KEÇİRİLƏCƏK 3-CÜ AZƏRBAYCAN BEYNƏLXALQ TƏHSİL VƏ KARYERA SƏRGİSİNDƏ 12 ÖLKƏDƏN 53 ŞİRKƏT İŞTİRAK EDƏCƏKDİR
Bakı, 9 sentyabr (AZƏRTAC). Sentyabrın 10-dan 12-dək Heydər Əliyev adına İdman-Konsert Kompleksində İteca Caspian LLC və onun tərəfdaşı İTE Group PLC şirkətlərinin təşkilatçılığı, Azərbaycan Təhsil Nazirliyinin dəstəyi ilə keçiriləcək “Education&Career” 3-cü Azərbaycan Beynəlxalq təhsil və karyera sərgisi ilə bağlı “Trend” xəbərlər şirkətində mətbuat konfransı olmuşdur.
Tədbirdə təhsil naziri Misir Mərdanov sərginin əhəmiyyətini diqqətə çatdırmış, ölkədə təhsil sahəsində qazanılmış uğurlardan danışmışdır. Bildirmişdir ki, Azərbaycan Prezidenti İlham Əliyevin 2007-2009-cu illərdə təsdiq etdiyi “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın, “2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı”nın və “2009-2013-cü illərdə Azərbaycan Respublikasının ali təhsil sistemində islahatlar üzrə Dövlət Proqramı”nın qəbul edilməsi ölkə iqtisadiyyatının inkişaf meyillərinə yüksək hazırlıqlı kadr potensialı hazırlanmasında əvəzsiz rol oynayacaqdır.
Nazir artıq təhsil və karyera sərgisinin Azərbaycanda keçirilən digər sərgilər arasında özünəməxsus yer tutduğunu, ötən ilə nisbətən iştirakçıların sayının 25 faiz artdığını söyləmişdir. Sevindirici haldır ki, sərgidə yalnız ali təhsil müəssisələri deyil, peşə məktəbləri, texnikumlar, hətta orta məktəblər də iştirak edəcəklər. Sərgidə iştirak edəcək xarici ölkələrin coğrafiyası da xeyli genişlənmişdir. Bu, Azərbaycan təhsilini, təhsilimizin nailiyyətlərini dünya ictimaiyyətinə təqdim etməklə yanaşı, dünya təhsil sistemində baş verən yeniliklərin də Azərbaycana gətirilməsidir. Sərgidə “Xaricdə təhsil” sektorunda İsveçrə, Böyük Britaniya, Almaniya, Türkiyə, Rusiya, İtaliya, Çexiya, Macarıstan və digər ölkələrin təhsil müəssisələri geniş təqdim olunacaqdır.
İteca Caspian şirkətinin direktoru Fərid Məmmədov, təhsil və karyera sərgisinin meneceri Xəyal Əliyeva tədbirdə dünyanın 12 ölkəsindən 53 təşkilat və şirkətin iştirak edəcəyini diqqətə çatdırmışlar. Bildirmişlər ki, iştirakçıların yarısı yerli təşkilatlardır. Sərgidə ilk dəfə olaraq ölkənin kənd təsərrüfatı sektorunda mütəxəssislər hazırlayan yeganə təhsil müəssisəsi - Azərbaycan Dövlət Aqrar Univerisiteti, həmçinin Bakı Peşəkar Liseyi iştirak edəcəkdir. Gənclər və İdman Nazirliyinin dəstəyi ilə qeyri-hökumət təşkilatları və birlikləri də belə mötəbər tədbirdə ilk dəfə çıxış edəcəklər. Sərgidə orta və ali təhsil, xaricdə təcrübə və iş, ixtisasın artırılması üzrə dil kursları və treninqlər, işəgötürmə, təhsil ədəbiyyatı və təhsil sahəsində informasiya texnologiyaları kimi bölmələr olacaqdır.
Məlumat verilmişdir ki, “Karyera” sektorunda xaricdə ali təhsil müəssisələrini bitirmiş gənclərin işlə təmin olunması proqramlarını təqdim edən Böyük Britaniya təşkilatları, ABŞ Ali Biznes Məktəbi və digər təşkilatlar təmsil olunacaqlar. İlk dəfə olaraq sərgidə İsveçrə tərəfindən mehmanxana işinin idarə olunması üzrə ali məktəb təqdim olunacaqdır. Belarus Təhsil Nazirliyi ölkənin dörd dövlət universitetinin ekspozisiyalarını birləşdirəcək stend ilə çıxış edəcəkdir.
Sonda KİV nümayəndələrinin sualları cavablandırılmışdır.
######