BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, iyunun 14-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı. “Təzə bazar” MMC-nin həyətindəki yarmarkaya Sabirabad, Zərdab, Gədəbəy, Göyçay və digər rayonlardan müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, şənbə günü burada əhaliyə 21,35 ton məhsul, o cümlədən 3 ton ət, 0,3 ton ağartı, 7 ton tərəvəz, 5 ton kartof, 6 ton meyvə, 12 min ədəd yumurta, 50 kiloqram bal təklif edilmişdir. Yarmarkada qiymətlər bazardakından 20-25 faiz aşağı olmuşdur.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində şəhər sakinləri Salyan, Kürdəmir, Quba, Şəmkir, Ağcabədi, Qax, Biləsuvar və Qəbələ rayonlarından gətirilmiş meyvə-tərəvəz, ağartı, bostan və konserv məhsullarını həvəslə alırdılar. Yarmarkada kartof, lobya, pendir, ərik, gilas və pomidor daha çox alınırdı.
Kənd Təsərrüfatı Nazirliyinin nümayəndəsi Namiq Qüdrətov bildirdi ki, bu gün rayonun ərazisində fəaliyyət göstərən yarmarkada satışa 209 tondan çox kənd təsərrüfatı məhsulları çıxarılmışdır. Satış-yarmarkaların xidmətindən minlərlə şəhər sakini istifadə edir. Həm alıcılar razı qalırlar, həm də fermerlər yetişdirdikləri məhsulları maneəsiz sata bilirlər.
Yarmarkada gilas və əriyin kiloqramı 1 manata, qarpızın kiloqramı 50 qəpiyə, lobyanın kiloqramı 40 qəpiyə satılırdı.
A.Şərifzadə küçəsi, 194, metronun “İnşaatçılar” stansiyasının 200 metrliyindəki yarmarkaya Salyan, Qusar, Dəvəçi, Oğuz və digər rayonlardan 46 tondan çox müxtəlif çeşidli kənd təsərrüfatı məhsulları gətirilmişdi.
Paytaxt sakinləri qiymətlərdən, məhsulların çeşidindən və keyfiyyətindən razılıq edirdilər.
Kənd Təsərrüfatı Nazirliyinin və Yasamal Rayon İcra Hakimiyyətinin nümayəndələri satışa nəzarət edir, alıcıların rəyləri, arzu və təklifləri ilə maraqlanırdılar.
Yarmarkada məhsullar bazardakından 20-25 faiz ucuz qiymətə satılırdı. Burada pomidorun kiloqramı 70-80, xiyar 50-80, soğan 30, ərik 40, kartof 30-50 qəpiyə, gilas 1 manat-1 manat 40 qəpiyə, alça 80 qəpik-1 manata, çiyələk 1 manat-1 manat 60 qəpiyə, mal əti 4 manat 50 qəpiyə, qoyun əti 5 manata, yumurtanın bir ədədi 10 qəpiyə təklif edilirdi.
Paytaxt sakinləri mal və qoyun ətini, meyvə-tərəvəzi, konserv və taxıl məhsullarını, şirələri, un məmulatını, ağartını, yumurtanı həvəslə alırdılar.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada satışa Ağdaş, Salyan və digər rayonlardan gətirilmiş 10 tondan çox məhsul çıxarılmışdı.
Ağdaşlı Cəmil Quliyev bildirmişdir ki, gətirdiyi pomidorun kiloqramını 80 qəpiyə təklif edir. İndiyədək bir neçə yarmarkada iştirak etmiş və 3 tondan çox məhsul satmışdır. Bundan sonra da paytaxta kənd təsərrüfatı məhsulları gətirəcəkdir.
Qəsəbə sakini Sənubər Qafarova satış yarmarkanın təşkil olunduğu ərazinin yaxınlığında yaşayır. Deyir ki, hər həftə buradan bazarlıq edir. Çünki məhsulların keyfiyyəti yüksək, qiyməti isə münasibdir.
Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba və Biləsuvar rayonlarının fermərləri alıcılara 30 tondan çox məhsul təklif edirdilər.
Kənd Təsərrüfatı Nazirliyinin nümayəndəsi Mustafa Rüstəmov demişdir ki, yarmarkada satılan məhsulların qiyməti bazardakından 25-30 faizə qədər ucuzdur. Satışda meyvə-tərəvəz, bitkiçilik məhsulları, ət-süd məmulatları, konservləşdirilmiş məhsullar boldur. Alıcılar məhsulun qiymətindən və keyfiyyətindən razıdırlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri satışa 5 tona qədər məhsul çıxarmışlar.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Qazax Rayon İcra Hakimiyyətinin nümayəndəsi İman Məmmədov bildirmişdir ki, rayonun fermerləri 5,2 ton meyvə, 2,4 ton tərəvəz, 6,5 ton kartof və müxtəlif heyvandarlıq məhsulları gətirmişlər.
Şəhər sakinləri burada bazardakından 30-40 faiz ucuz təklif edilən lobyanı, gilası, çiyələyi, əriyi, xiyarı və digər məhsulları həvəslə alırdılar.
Ümumilikdə yarmarkada satışa 26 tondan çox məhsul çıxarılmışdı.
Binəqədi rayonunda 6 nömrəli Bakı Texniki Peşə Liseyinin qarşısında təşkil olunmuş yarmarkada da bolluq nəzərə çarpırdı. Burada Bərdə, Goranboy və ağstafalı fermerlər əhaliyə ucuz qiymətə müxtəlif çeşiddə meyvə-tərəvəz və süd məhsulları satırdılar.
Alıcılar yarmarkanın təşkilindən razı qaldıqlarını bildirirdilər.
######
 |
 |
Bölmənin digər xəbərləri
