Bakıda magistrantların II respublika elmi konfransı başlanıb
Bakı, 18 aprel, AZƏRTAC
Aprelin 18-də Azərbaycan Dövlət Pedaqoji Universitetində (ADPU) magistrantların “Yeni texnologiyalar və tədris prosesinin idarə olunması” mövzusunda II respublika elmi konfransı öz işinə başlayıb. Konfrans Prezident İlham Əliyevin 2018-ci il 9 aprel tarixli Sərəncamına əsasən təsis edilmiş “Elm günü”nə həsr olunub.
AZƏRTAC xəbər verir ki, konfransı açan rektor Cəfər Cəfərov Azərbaycanın dövlət müstəqilliyini bərpa etdikdən sonra ölkəmizin ictimai-siyasi, sosial-iqtisadi və elmi-mədəni həyatında böyük keyfiyyət dəyişiklikləri baş verməsindən, təhsil sahəsinin sürətlə inkişaf etməsindən danışıb. Ulu öndər Heydər Əliyevin “Təhsil millətin gələcəyi, müstəqil dövlətin təməlidir” kimi fikrini xatırladan rektor Cəfər Cəfərov Ümummilli Liderin rəhbərliyi ilə təhsil sahəsinin qanunvericilik bazasının təkmilləşdirildiyini, normativ-hüquqi sənədlər hazırlandığını, maddi-texniki bazanın gücləndirildiyini, təhsilin keyfiyyətinin yüksəldiyini vurğulayıb. Qeyd edib ki, ulu öndər Heydər Əliyev yüksəkixtisaslı pedaqoji və elmi-pedaqoji kadrların hazırlanmasına xüsusi diqqət yetirirdi. Ümummilli Liderin “Mən Yer üzündə müəllimdən yüksək ad tanımıram” kəlamı fəaliyyətimizin leytmotivini təşkil edir.
Prezident İlham Əliyevin elm və təhsilin inkişafına xüsusi diqqət və qayğı göstərdiyini vurğulayan professor Cəfər Cəfərov deyib: “Bu qayğı və diqqətdən ruhlanan ADPU elm və təhsilimizin inkişafına öz töhfələrini verir. Aparılan islahatlar, həyata keçirilən yeniliklər, layihələr ADPU-nun yeni inkişaf mərhələsinə daxil olmasına şərait yaradıb. 2021-ci ildə ADPU-nun yaradılmasının 100 ili tamam olacaq. Biz əldə edilmiş uğurlarla kifayətlənməməli, fəaliyyətimizi müasir dünyanın çağırışlarına uyğun qurmalıyıq. Bu baxımdan magistrantlarımızın üzərinə böyük məsuliyyət düşür. Onlar daim çalışmalı, bilik və bacarıqlarını artırmalı, rəqəmsal bilikləri, dünyanın aparıcı xarici dillərini dərindən öyrənməli, vətənpərvər olmalıdırlar. Hazırda ADPU-da 17 ixtisas, 18 ixtisaslaşma üzrə 707 magistr təhsil alır. Bugünkü konfransda Bakı Dövlət Universitetinin, Lənkəran Dövlət Universitetinin, Odlar Yurdu Universitetinin və digər universitetlərin magistrantları iştirak edirlər. Konfransa 503 nəfər magistrant məqalə təqdim edib. Ötən illə müqayisədə bu, 2 dəfə çoxdur”.
ADPU-nun elm və innovasiyalar üzrə prorektoru, professor Asəf Zamanov çıxışında qeyd edib ki, müasir dünyamızda dövlətlərin gücü onların elmi səviyyəsi ilə müəyyən edilir. Ölkəmizdə “Elm günü”nün təsis edilməsi elmin inkişafı üçün stimul yaradır. Son illər ADPU-da elmi-tədqiqat işlərinin səviyyəsi yüksəlib, professor-müəllim heyətinin impakt faktorlu jurnallarda dərc edilən elmi məqalələrinin sayı artıb, alimlərimiz müxtəlif respublika və beynəlxalq miqyaslı elmi toplantılarda fəal iştirak edirlər. Universitetdə elmi fəaliyyətin biznes tərəfinə ciddi diqqət yetirilir. ADPU Azərbaycan Respublikasının Prezidenti yanında Elmin İnkişafı Fondunun 5 qrant layihəsini qazanıb. Eyni zamanda, gənclərin elmi fəaliyyətə cəlb edilmələrinə xüsusi önəm verilir. Professor Asəf Zamanov qeyd edib ki, ötən illə müqayisədə builki konfransda həm kəmiyyət, həm də keyfiyyət baxımından dinamika müşahidə edilir. ADPU-da son 3 ildə dissertasiya işləri yüksək səviyyədə müdafiə edilir. Elm və innovasiyalar üzrə prorektor ADPU-da keçirilən elmi tədbirlər barədə də geniş məlumat verib.
Odlar Yurdu Universitetinin rektoru, professor Əhməd Vəliyev, Bakı Dövlət Universitetinin elm və innovasiyalar üzrə prorektoru, AMEA-nın müxbir üzvü, professor Aydın Kazımzadə, Azərbaycan Dövlət Neft və Sənaye Universitetinin elm və texnika işləri üzrə prorektoru, dosent Rauf Əliyarov konfransın yüksək səviyyədə təşkilinə görə ADPU-nun rəhbərliyinə təşəkkür edib və konfransın işinə uğurlar arzulayıblar.
Çıxışlarda qeyd edilib ki, ADPU ölkəmizin taleyində böyük rol oynayıb. Xalqın, millətin varlığı auditoriyalardan, müəllimlərdən başlayır. Bu mənada müəllim hazırlığı ilə məşğul olan ali təhsil müəssisələrinin üzərinə mühüm vəzifələr düşür. Gənclərimiz ənənəvi və yeni dəyərləri dərindən mənimsəməli, yüksək səviyyəli mütəxəssis kimi yetişməlidirlər.
Sonra magistrantlardan Abdulxaliq Məmmədli “Məktəb idarəçiliyində sistem liderliyi”, Aysel Cəlallı “Riyaziyyat dərslərində əyləncəli və maraqlı çalışmalar vasitəsilə şagirdlərin idraki maraqlarının formalaşdırılması yolları” mövzusunda çıxışlar ediblər.
Elmi konfrans 4 bölmədə - innovasiyalar və təhsilin keyfiyyəti, təhsilin təşkili və idarəedilməsi, təhsildə sosial-psixoloji problemlər və tədrisin müasir problemləri bölmələrində davam edib.
İki gün davam edəcək konfransın yekun iclasında bölmə rəhbərlərinin hesabatları dinləniləcək, müvafiq qərarlar qəbul ediləcək.
Bölmənin digər xəbərləri
