BMU və YAP-ın təşkilatçılığı ilə Şuşada “Yay məktəbi” təşkil olunub
Bakı, 5 iyun, AZƏRTAC
Şuşa şəhərində Bakı Mühəndislik Universiteti (BMU) və Yeni Azərbaycan Partiyası (YAP) Abşeron rayon təşkilatının birgə təşkilatçılığı ilə “Şəhərsalma və Memarlıq İli” çərçivəsində Ümummilli Lider Heydər Əliyev ideyalarının təbliğinə həsr olunmuş “Yay məktəbi” keçirilib.
Bu barədə AZƏRTAC-a BMU-dan məlumat verilib. Tədbirin açılışında çıxış edən YAP Abşeron rayon təşkilatının sədri Abbas Əliyev Ümummilli Lider Heydər Əliyevin layiqli siyasi davamçısı Prezident İlham Əliyevin rəhbərliyi ilə işğaldan azad edilmiş ərazilərdə həyata keçirilən genişmiqyaslı bərpa, yenidənqurma layihələrinin ölkənin iqtisadi qüdrətini və inkişaf potensialını nümayiş etdirdiyini bildirib. “Yay məktəbi”nin əhəmiyyətindən danışan rayon təşkilatının sədri layihənin gənclərin bilik və bacarıqlarının artırılmasına, liderlik keyfiyyətlərinin inkişafına, komanda işinin formalaşmasına və ictimai fəallıqlarının yüksəldilməsinə xidmət etdiyini deyib.
BMU-nun rektoru Yaqub Piriyev çıxış edərək tarixi torpaqlarımızda bir araya gəlmək, milli dövlətçilik ideyalarımızın işığında gələcəyimizi birlikdə düşünməyin unudulmaz mənəvi dəyər olduğunu vurğulayıb. Bildirib ki, “Yay məktəbi” milli yaddaşımızın, memarlıq irsimizin və dövlətçilik ənənələrimizin gənc nəslə aşılanması baxımından olduqca mühüm platformadır. Rektor keçmiş SSRİ dönəmində sərt qadağalara baxmayaraq, qədim Azərbaycan şəhəri Şuşanın milli simasının müəyyənləşdirilməsində Ulu Öndər Heydər Əliyevin xüsusi rolunu önə çəkib. Onun Azərbaycana rəhbərliyi dövründə Şuşada görkəmli mədəniyyət və ədəbiyyat xadimlərinin ev-muzeylərinin yaradılması, büstlərinin qoyulması, habelə Xankəndiyə dəmir yolunun çəkilməsi üçün gördüyü işləri diqqətə çatdırıb. O, Heydər Əliyevin bilavasitə rəhbərliyi ilə sovet dövründə həyata keçirilən şəhərsalma proqramlarının Azərbaycanın sənaye və sosial infrastrukturu üçün əsas yaratdığını, müstəqillik dövründə isə yeni iqtisadi və siyasi reallıqlara uyğun şəhər inkişaf modelinin formalaşdığını qeyd edib. Vurğulanıb ki, bu siyasi və mənəvi xətt Prezident İlham Əliyev tərəfindən uğurla davam etdirilir. Xüsusilə işğaldan azad edilmiş ərazilərdə Prezident İlham Əliyevin və Birinci vitse-prezident Mehriban Əliyevanın rəhbərliyi ilə həyata keçirilən bərpa və yenidənqurma layihələri müasir şəhərsalma modelinin mühüm nümunəsinə çevrilib. Yaqub Piriyev Bakıda keçirilən BMT-nin Ümumdünya Şəhərsalma Forumunun 13-cü Sessiyasına diqqət çəkərək, tədbirin ölkəmizin beynəlxalq nüfuzunun, şəhərsalma siyasətinin və davamlı inkişaf sahəsində həyata keçirdiyi uğurlu strategiyanın növbəti təsdiqi olduğunu, Azərbaycanın artıq regionun deyil, dünyanın mühüm şəhərsalma və memarlıq mərkəzlərindən biri kimi qəbul edildiyini deyib.
Ailə, Qadın və Uşaq Problemləri üzrə Dövlət Komitəsinin sədri, YAP İdarə Heyətinin üzvü Bahar Muradova isə çıxışında dövlət gənclər siyasətinin əhəmiyyətindən bəhs edib. O bildirib ki, Azərbaycan gəncləri dövlətin yaratdığı imkanlardan yararlanaraq ölkənin ictimai-siyasi həyatında fəal iştirak edir və müxtəlif sahələrdə mühüm nailiyyətlər qazanırlar.
YAP Mərkəzi Aparatının Təşkilat şöbəsinin baş məsləhətçisi Orxan Bayramov isə Şuşanın Azərbaycanın tarixi Zəfərinin, milli birliyinin və yenidənqurma iradəsinin simvolu olduğunu deyib. O vurğulayıb ki, “Yay məktəbi” iştirakçıların bilik və dünyagörüşünün genişlənməsinə, onların gələcək fəaliyyətində dövlətçilik ideyalarına daha sıx bağlılıq nümayiş etdirmələrinə xidmət edəcək.
Daha sonra BMU-nun Memarlıq kafedrasının müdiri Sabir Orucov “Müasir şəhərsalma prinsipləri, davamlı şəhər inkişafı, ağıllı şəhər konsepsiyası” mövzusunda məruzə ilə çıxış edib. Ardınca universitetin Memarlıq və inşaat fakültəsi tələbələrinin yaradıcılıq layihələrindən ibarət sərgiyə baxış keçirilib.
“Yay məktəbi”nin növbəti günü Ulu Öndər Heydər Əliyevin dövlət quruculuğu strategiyası, gənclər siyasəti və ideoloji irsinə həsr olunan seminarla davam edib. Tədbirdə BMU-nun sosial məsələlər və ictimaiyyətlə əlaqələr üzrə prorektoru Bayram Hüseynzadə “Ümummilli Liderin dövlət quruculuğu strategiyası, gənclər siyasəti və ideoloji əsaslar” mövzusunda geniş məruzə ilə çıxış edib.
Seminardan sonra iştirakçılar arasında “Nə? Harada? Nə zaman?” intellektual oyunu təşkil olunub. Sonra bilik yarışının qalibləri, “Yay məktəbi” çərçivəsində fəallığı ilə seçilən gənclər fəxri fərmanlarla təltif olunublar.
“Yay məktəbi”nin sonuncu günü iştirakçılar Xankəndi şəhərinə səfər edərək Qarabağ Universitetində olublar.
Sonda “Yay məktəbi”nin iştirakçıları Şuşanın tarixi-mədəni məkanları, şəhərdə aparılan genişmiqyaslı bərpa və quruculuq işləri ilə tanış olublar.
Bölmənin digər xəbərləri
