BAKIDA SƏUDİYYƏ ƏRƏBİSTANI KRALLIĞI RƏSSAMLARININ KARİKATURA SƏRGİSİ AÇILMIŞDIR
AZƏRTAC xəbər verir ki, iyunun 18-də Bakıda Bədii Sərgi Salonunda Azərbaycanda Səudiyyə Ərəbistanı Krallığının Mədəniyyət Günləri çərçivəsində karikatura sərgisi açılmışdır.
Mədəniyyət və turizm nazirinin müavini Sevda Məmmədəliyeva Azərbaycanda karikaturanın yaranma tarixindən danışmışdır. O bildirmişdir ki, karikatura bizə özümüzü və ətrafdakıları gözlənilməz, fərqli nəzər nöqtəsindən göstərir, müəllifin mənsub olduğu cəmiyyətin və dövrün nöqsanlarını aydın şəkildə əks etdirir.
Səudiyyə Ərəbistanı Krallığının mədəniyyət və informasiya nazirinin müavini Əbubəkr Bahadur sərgidə nümayiş olunan karikaturalar haqqında məlumat vermişdir ki, rəsmlər nəinki Krallığın, eyni zamanda, müasir dünyanın ictimai-siyasi, sosial həyatında olan nöqsanları satirik vasitə ilə göstərir.
Açılışı bildirən rəmzi lent kəsildikdən sonra tamaşaçılar sərgi ilə tanış olmuşlar.
Sərgidə qadın rəssamların 40-a yaxın əsəri nümayiş etdirilir.
Bölmənin digər xəbərləri
