BAKIDA TALASSEMİYALI UŞAQLARIN PROBLEMLƏRİNƏ HƏSR OLUNMUŞ KONFRANS KEÇİRİLMİŞDİR
AZƏRTAC xəbər verir ki, iyunun 6-da “Savab Dünyası” Talassemiya Assosiasiyası talassemiyalı uşaqların problemlərinə həsr olunmuş konfrans keçirmişdir.
Tədbirdə Türkiyə Talassemiya Federasiyasının prezidenti professor Duran Canatan, B.Eyvazov adına Elmi-Tədqiqat Hematologiya və Transfuziologiya İnstitutunun direktoru Azad Hacıyev, xəstəlikdən əziyyət çəkən uşaqların valideynləri iştirak etmişlər.
Konfransı Azad Hacıyev açaraq, talassemiyanın diaqnostikası və müalicəsində müasir metodlar, o cümlədən sümük iliyinin transplantasiyasında türkiyəli həkimlərlə əməkdaşlığın bu sahədə bir sıra uğurların qazanılmasına şərait yaradacağını söyləmişdir. Ölkəmizdə bu xəstəliyin müalicəsi istiqamətində görülən işlərdən danışan direktor, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın əvəzsiz xidmətlərini xüsusi vurğulamışdır.
Professor Duran Canatan isə Azərbaycanda talassemiyalı xəstələrin müalicəsi üçün dövlətin diqqət və qayğısından məmnun qaldığını söyləmişdir. Türkiyəli qonaq Azərbaycan hökumətinin, xüsusilə Heydər Əliyev Fondunun səhiyyə sahəsində həyata keçirdiyi layihələri yüksək qiymətləndirmidir. O, yaxın zamanlarda Bakıda istifadəyə veriləcək talassemiya mərkəzi binasının inşasına göstərdiyi dəstəyə görə Azərbaycanın birinci xanımı Mehriban Əliyevaya minnətdarlığını bildirmişdir. Mərkəzin ən müasir tələblərə cavab verəcəyini bildirən alim, yeni səhiyyə ocağının talassemiyalı xəstələrin müalicəsində uğurlar qazanacağına əmin olduğunu söyləmişdir.
D.Canatan 2010-cu ildə Bakıda türkdilli ölkələrin mütəxəssislərinin iştirakı ilə Beynəlxalq Talassemiya Konqresinin keçirilməsi üçün artıq razılığın əldə olunduğunu bildirmişdir.
Daha sonra D. Canatan xəstəliyə müasir yanaşmalar və üsullar haqqında məruzə ilə çıxış etmişdir.
Bölmənin digər xəbərləri
