“BAKUSTİK-CAZ” QRUPU KAUNASDA CAZ FESTİVALINDA ÇIXIŞ EDƏCƏK
Bakı Caz mərkəzindən AZƏRTAC-a bildirmişlər ki, aprelin 24-də Litvada “Kaunas Jazz Festival-2008” Beynəlxalq caz festivalı açılacaqdır. Festivalda MDB və Avropa ölkələrində dəfələrlə çıxış edən Azərbaycanın “Bakustik-caz” qrupu iştirak edəcəkdir. Qrup (rəhbəri Salman Qəmbərov) festivala Mədəniyyət və Turizm Nazirliyinin dəstəyi ilə yola düşəcəkdir.
“Bakustik-caz” 1996-cı ildə tam formalaşmışdır, lakin onun tərkibi qrupun qarşısına qoyulan məqsədlərdən, bu və ya digər festivalda musiqinin istiqamətindən, həyata keçirilən layihələrdən asılı olaraq dəyişilir. Qrup xalq çalğı alətlərinin ifaçılarını da tez-tez dəvət edir.
İndiki festival Latin jazz və Nu jazz üslubuna yönələn növbəti festivaldır. “Bakustik-caz” aprelin 24-də “Guida de palva & Jazzinho” qrupu ( Portuqaliya- Böyük Britaniya) ilə bərabər çıxış edəcəkdir. Sonrakı günlərdə Polşa, İsrail, İtaliya və digər ölkələrin cazmenləri çıxış edəcəklər.
Festival aprelin 28-də başa çatacaqdır.
Bölmənin digər xəbərləri
