BALAKƏNDƏ YENİ MƏKTƏB BİNALARI TİKİLİR
Balakən Rayon İcra Hakimiyyətindən AZƏRTAC-ın müxbirinə bildirmişlər ki, Dövlət Neft Şirkətinin vəsaiti ilə rayonun Qaysa kəndində 480 şagirdlik yeni məktəb binasının tikintisinə başlanılmışdır. İkimərtəbəli yeni məktəb binasında sinif otaqları ilə yanaşı, idman zalı, yeməkxana, kompyuter otağı, laboratoriya, idman meydançası olacaqdır. Müasir istilik sistemi quraşdırılacaq təhsil ocağı yeni avadanlıqla təchiz ediləcəkdir.
Bundan əlavə, Gülüzənbinə kənd məktəbi üçün dövlət vəsaiti hesabına 120 yerlik məktəb binası da tikilir. Rayonun sosial-iqtisadi inkişafının sürətləndirilməsinə dair əlavə tədbirlər planına uyğun olaraq, Qaravəlli kənd orta məktəbi üçün dövlət vəsaiti hesabına inşa edilən 360 şagird yerlik məktəb binasının tikintisi sürətlə aparılır. Hər üç məktəb binasının yeni dərs ilinədək istifadəyə verilməsi nəzərdə tutulmuşdur.
Bölmənin digər xəbərləri
