Brüssel, 1 fevral, AZƏRTAC

Belçikanın “Bizim dünyamız” (“Our World”) jurnalında Milli Məclisin deputatı, Avropa İttifaqı-Azərbaycan Parlament Əməkdaşlıq Komitəsinin həmsədri Cavanşir Feyziyevin “Azərbaycan-Avropa İttifaqı əməkdaşlığının yeni üfüqləri” adlı məqaləsi dərc olunub.

AZƏRTAC xəbər verir ki, məqalədə Avropa ilə Asiya arasında körpü rolunu oynayan Azərbaycanın qədim dövlətçilik tarixi, demokratik ənənələri haqqında ətraflı məlumat verilir. Bir əsr əvvəl Avropada çox mürəkkəb hərbi-siyasi hadisələrin cərəyan etdiyi bir zamanda Azərbaycan xalqının müsəlman Şərqində ilk demokratik respublika yaratması faktını vurğulayan deputat bütün çağırışlara və təhdidlərə baxmayaraq, ilk Azərbaycan Respublikasının mütərəqqi ümumbəşəri dəyərlər əsasında təşəkkül tapdığını vurğulayır. Bildirir ki, 1920-ci ildə Azərbaycan qırmızı ordu tərəfindən işğal olunub və ölkədə 70 il kommunist rejimi hökm sürüb. Bu işğal Azərbaycan xalqının birinci müstəqilliyinə son qoysa da, xalqımızın yaddaşlarından azadlıq və müasirlik ruhunu silə bilməyib. 1991-ci ildə Azərbaycan öz müstəqilliyini bərpa edib və müasir dünya ilə münasibətlərini qurmaq üçün yeni fürsət qazanıb. Yenidən müstəqillik əldə etmiş Azərbaycanın ilk addımlarından biri Avropa ailəsinə inteqrasiya etmək olub və buna görə də qonşu Ermənistanla münaqişəyə cəlb edilib. Müstəqilliyin ilk illərində Azərbaycan ərazisinin 20 faizi Ermənistan tərəfindən işğal olunub. Müəllif bütün maneələrə baxmayaraq, Azərbaycanın Avropa strukturları ilə əlaqələrini tədricən, lakin davamlı olaraq dərinləşdirdiyini, bu gün Azərbaycanın Avropa İttifaqı üçün Cənubi Qafqaz regionunda ən etibarlı tərəfdaş, Aİ-nin isə Azərbaycanın ən böyük ticarət tərəfdaşı olduğunu diqqətə çatdırır. Enerji və nəqliyyat sahələrində Azərbaycan ilə Aİ arasında mövcud və gündən-günə genişlənən əməkdaşlıq hər iki tərəfə böyük imkanlar vəd edir. Bu baxımdan 2020-ci ildə tam gücü ilə fəaliyyətə başlaması gözlənilən Cənub Qaz Dəhlizinin, eləcə də artıq istifadəyə verilmiş və Avropa ilə Asiyanı bir-birinə bağlayan Bakı-Tbilisi-Qars dəmir yolu xəttinin verəcəyi töhfələrdən söz açılır.

Cənubi Qafqaz regionunun geostrateji əhəmiyyətini vurğulayan və bu regionun böyük potensialına diqqət çəkən deputat Ermənistan-Azərbaycan Dağlıq Qarabağ münaqişəsinin hələ də regionun hərtərəfli inkişafına başlıca əngəl olaraq qaldığını qeyd edir.

Qeyd edək ki, “Our World” jurnalı 2011-ci ildən nəşr olunan illik jurnaldır. Bu jurnalda dərc edilən məqalələr dünyada baş verən siyasi, hərbi və iqtisadi xarakterli proseslərlə bağlı təqdim olunmuş çoxsaylı yazılar arasından seçilir. Bu günə qədər 584 müəllifin, o cümlədən 33 dövlət başçısının yazılarını dərc edən “Our World” jurnalı 10 min tirajla çap olunur və əsasən Brüsseldə yerləşən beynəlxalq təşkilatlar, siyasi partiyalar və xarici ölkələrin diplomatik missiyaları üçün nəzərdə tutulur.

Şəhla Ağalarova

AZƏRTAC-ın xüsusi müxbiri

Brüssel