BERLİNDƏ ÜMUMMİLLİ LİDER HEYDƏR ƏLİYEVİN 85 İLLİK YUBİLEYİNƏ HƏSR OLUNMUŞ SƏRGİ AÇILMIŞDIR
Azərbaycanın Almaniyadakı səfirliyindən AZƏRTAC-ın xüsusi müxbirinə bildirmişlər ki, Berlin şəhərindəki “Berlin-Bakı Qalereyası”nda (GBB) ümummilli lider Heydər Əliyevin 85 illik yubileyi münasibətilə azərbaycanlı rəssam və memarların əsərlərindən ibarət sərgi açılmışdır. Sərgi Azərbaycanın Almaniyadakı səfiri Pərviz Şahbazovun və Almaniyanın Azərbaycandakı səfiri Per Kristofer Stançinanın himayədarlığı ilə keçirilir.
Sərgidə Azərbaycan Dövlət Rəssamlıq Akademiyasının rektoru, akademik Ömər Eldarovun rəhbərliyi ilə akademiya müəllimlərinin boyakarlıq, qrafika və memarlıq janrlarında 30-dək əsəri nümayiş etdirilir.
İki ay davam edəcək sərgini GBB-nin direktoru İbrahim Əhrari açmışdır. Səfir P.Şahbazov çıxış edərək ümummilli lider Heydər Əliyevin Azərbaycan mədəniyyət və incəsənətinə göstərdiyi qayğıdan, Azərbaycan və Almaniya arasında mədəniyyət sahəsində münasibətlərin inkişafından danışmışdır.
AFR Xarici İşlər Nazirliyi mədəniyyət bölməsinin rəhbəri Volfqanq Dik türk dilində çıxış edərək, bu sərgini Azərbaycan mədəniyyətinin Almaniyada təbliği sahəsində növbəti uğur kimi səciyyələndirmişdir. O, ümumilikdə “Almaniyada Azərbaycan İli-2008” mədəniyyət proqramı çərçivəsində təşkil edilən tədbirlərin iki ölkə arasında münasibətlərin daha da yaxınlaşmasına töhfə verəcəyini vurğulamışdır.
Sonra Rəssamlıq Akademiyasının rektoru Ömər Eldarov və prorektor Səlhab Məmmədov çıxış edərək akademiyanın 15-dən çox müəlliminin işinin Berlində təqdim edilməsini yüksək dəyərləndirərək, GBB rəhbərliyinə, səfirliyə və sponsorlara minnətdarlıqlarını bildirmişlər.
“Berlin-Bakı Qalereyası” ötən il noyabrın 18-də açılmışdır. İdeyanın təşəbbüskarları berlinli rəssam və dizayner İbrahim Əhrari və bakılı incəsənət xadimi Emin Məmmədovdur. Qalereyanın məqsədi almaniyalı və azərbaycanlı rəssamların, heykəltəraşların və digər incəsənət nümayəndələrinin əsərlərindən ibarət sərgilərin təşkili və iki xalq arasında mədəni münasibətlərin daha da intensivləşməsinə dəstək göstərməkdir.
Almaniyada Azərbaycan İli çərçivəsində Azərbaycan mədəniyyət və incəsənətinin avropalılara tanıdılması məqsədi ilə tədbirlərin keçirilməsi davam edir.
Bölmənin digər xəbərləri
