Bakı, 25 yanvar (AZƏRTAC). Azərbaycan teleməkanında və şou-biznesində yeni beynəlxalq musiqi layihəsi - “Böyük səhnə”nin ilk efir həyəcanı başlayacaqdır.

İdeyası Gənclər və İdman Nazirliyinə və Ukraynanın “Euromedia” şirkətinə məxsus layihənin məqsədi ən istedadlı vokal ifaçılarını tapmaq və onlara nadir bir imkan - Avropanın və dünyanın ən yaxşı şou-biznes mütəxəssisləri ilə işləmək, bütün mərhələlərdən keçərək beynəlxalq ulduzlardan ibarət münsiflər heyəti qarşısında möhtəşəm şouda çıxış etmək imkanı verməkdir.

Layihə Avropanın ən yaxşı musiqi prodüserlərini, musiqiçiləri, bəstəkarları, ulduzları, vokal, xoreoqrafiya və aktyor sənəti təlimçilərini cəlb etməklə beynəlxalq komanda tərəfindən həyata keçirilir. Müsabiqənin münsiflər heyətində “Eurovision-2011” mahnı müsabiqəsində Azərbaycana qalibiyyət qazandıran müğənni Eldar Qasımov da vardır.

Eldar Qasımov AZƏRTAC-a bildirmişdir ki, layihə çərçivəsində Lənkəran, Gəncə, Şəki və Bakıda keçirilən kastinqlər zamanı 50 nəfər super kastinqə vəsiqə qazanmışdır. “Böyük səhnə” layihəsi Azərbaycan şou-biznesində əvəzsiz bir layihədir. Düşündüm ki, “Eurovision” və başqa dünya səhnələrində qazandığım təcrübəni gənc iştirakçılarla bölüşə biləcəyəm. Hazırda layihədə münsif kimi iştirak edirəm. Növbəti mərhələdə mənə münsif, aparıcı və ekspert olmağı təklif etdilər. Mən isə ekspert qismində çıxış etməyi seçdim. Çünki ekspert iştirakçılarla daha çox ünsiyyətdə olur.

“Böyük səhnə” layihəsində 12 nəfər yarımfinala vəsiqə qazanmışdır. Final mərhələsi fevralın 9-da Ukraynada baş tutacaqdır. Finalda üç super finalçı seçiləcəkdir.

Martın 9-da super final olacaq və finalçılar bu müddətdə Ukrayna və İsveçdə təcrübə keçəcəklər. Super finalçılardan bir nəfər “Böyük səhnə”nin kralı seçiləcəkdir. Lakin hər üç super finalçı müxtəlif - klip, albom, ya da hər hansısa musiqi şirkəti ilə müqavilə kimi hədiyyələrlə təltif olunacaqlar.