Bakı, 7 may, Təhminə Verdiyeva, AZƏRTAC

Gənclik hər bir millətin sabahı, inkişafının təməl dayağı və cəmiyyətin ruhudur. Bu səbəbdən də ölkəmizdə gənclərin potensialının üzə çıxarılması, onların intellektual və liderlik bacarıqlarının inkişaf etdirilməsi, eləcə də ictimai həyatda fəal iştirakının təmin olunması dövlət siyasətinin prioritet istiqamətlərindəndir. Müsahibimiz bu strategiyanın parlaq nümunəsidir – enerjisi, bilik və bacarığı ilə seçilən, həm yerli, həm də beynəlxalq səviyyədə uğur qazanmış nüfuzlu bir gənc. AZƏRTAC-ın müxbiri bu dəfə istedadlı gənc Cəsur Mədətzadə ilə həyat yolu, məqsədləri və gələcək planları barədə söhbətləşib.

-Özünüzü təqdim edin. Sizi layihə idarəçiliyinə gətirən əsas motivasiya nə olub və ilk təcrübənizi necə xatırlayırsınız?

– Mən ADA Universitetində dövlət idarəetməsi ixtisası üzrə magistr təhsili alıram. Son 5 ildə gənclərlə iş, qeyri-formal təhsil və layihə idarəçiliyi sahəsində həm ölkə daxilində, həm də beynəlxalq arenada fəal şəkildə çalışıram. Müxtəlif gənclər təşkilatlarında rəhbərlik və koordinatorluq vəzifələrində fəaliyyət göstərərək komanda idarəçiliyi, strateji planlaşdırma və layihələrin effektiv icrası sahəsində dəyərli təcrübə toplamışam. Hazırda Azərbaycan Respublikası Gənclər Fondunun Təlimçilər Bazasının üzvüyəm və bir sıra mövzularda təlimlər keçirirəm.

Məni layihə idarəçiliyinə gətirən əsas motivasiya bir ideyadan doğdu: “Bir ideyanın reallaşması üçün doğru plan və düzgün komanda vacibdir”. Könüllülük fəaliyyətim zamanı müşahidə etdim ki, yaxşı təşkil olunmuş bir layihə təkcə iştirakçıların bilik və bacarıqlarını artırmır, həm də cəmiyyətə təsir edərək real dəyişiklik yaradır. Bu dəyişikliklərin bir parçası olmaq arzusu mənim marağımı daha da artırdı.

İlk real təcrübəm NAYORA-da könüllü olduğum dövrdə oldu. Mentorumun dəstəyi ilə könüllülər üçün inkişaf proqramı təşkil etdim. Sadə bir ideya ilə başlanan bu təşəbbüs planlaşdırma, resursların bölüşdürülməsi, iştirakçıların cəlb olunması və nəticələrin qiymətləndirilməsi kimi mərhələlərlə mənə layihə idarəçiliyinin nə qədər çoxşaxəli və maraqlı bir proses olduğunu göstərdi.

-ADA Universitetində aldığınız təhsil beynəlxalq layihələrdəki rolunuzu necə formalaşdırdı?

– ADA Universitetində dövlət idarəetməsi üzrə magistr proqramı mənə layihələrə daha strateji və sistemli yanaşma imkanı verdi. Layihə idarəçiliyi, liderlik, qərarvermə və ictimai siyasət analizi kimi dərslər beynəlxalq mühitdə üzləşdiyim mürəkkəb situasiyalarda çevik və məntiqi qərarlar verməyə kömək etdi. Xüsusilə “stakeholder analysis” və “risk management” kimi alətlər beynəlxalq layihələrdə müxtəlif maraqlı tərəflərlə düzgün balans qurmaq baxımından çox faydalı oldu.

ADA-nın praktikyönümlü tədris metodu (case study, simulasiya oyunları və layihə əsaslı öyrənmə) mənə real qərarları daha əsaslı şəkildə verməyi öyrətdi. Hazırda beynəlxalq layihələrdə sadəcə icraçı deyil, təşəbbüs göstərən və komandaları effektiv şəkildə yönəldən lider kimi çıxış edə bilirəmsə, bu, məhz ADA-da qazandığım akademik bilik və təcrübənin nəticəsidir.

-İştirak etdiyiniz beynəlxalq layihələr arasında sizin üçün ən transformativ olanı hansıdır və nə üçün?

– Mənim üçün ən transformativ beynəlxalq təcrübə “Youth Connect Africa Summit 2023” olub. 8-12 dekabr tarixlərində Keniyanın Nayrobi şəhərində keçirilən bu tədbirdə Azərbaycan nümayəndə heyətinin üzvü olaraq NAYORA-nı təmsil etdim. Tədbir Keniya hökuməti, BMT-nin İnkişaf Proqramı və “YouthConnekt Africa Hub”ın birgə təşkilatçılığı ilə baş tutmuş və 20 mindən çox gənci, dövlət rəsmilərini və vətəndaş cəmiyyəti liderlərini bir araya gətirmişdi.

Tədbir mənə layihə idarəçiliyinə yeni baxış bucaqları qazandırdı. Müxtəlif ölkələrdən olan təşkilatlarla birbaşa fikir mübadiləsi aparmaq, qlobal əməkdaşlıq imkanları yaratmaq və daha inklüziv yanaşmaların vacibliyini anlamaq mənim layihə dizaynına sistemli yanaşmamı möhkəmləndirdi. Həmçinin tədbir zamanı Keniyadakı səfirliyimizlə əməkdaşlıq çərçivəsində səfirimiz Sultan Hacıyevlə görüşmək mənim üçün xüsusi önəm kəsb etdi.

-1000-dən çox gəncin inkişafına dəstək olmaq məsuliyyətli bir vəzifədir. Bu yolda qarşılaşdığınız əsas çətinliklər nələrdir və onlarla necə mübarizə aparırsınız?

– Ən çox rast gəlinən çətinliklərdən biri gənclərin komfort zonalarından çıxmaqda tərəddüd etməsidir. Bəzən təşəbbüs göstərməkdən və məsuliyyət götürməkdən çəkinirlər. Mən onlara kiçik, lakin məqsədyönlü tapşırıqlar həvalə etməklə bu qorxunu aşmağa kömək edirəm.

Digər çətinlik isə texnologiyanın və sosial medianın qeyri-məqsədli istifadəsidir. Araşdırmalara görə, insanlar sərbəst vaxtlarının əksəriyyətini ekran qarşısında keçirirlər. Bu isə “brain rot” – zehni diqqətin və yaradıcılığın zəifləməsi problemini doğurur. Bu səbəbdən, gənclərə rəqəmsal savadlılıq, vaxtın effektiv idarə olunması və texnologiyanın yaradıcı istifadə yolları barədə təlimlər keçirirəm.

-Gənclərə verdiyiniz ən vacib məsləhət nədir və onlar bugünkü dünyada uğur qazanmaq üçün nələrə fokuslanmalıdırlar?

– Gənclərə verdiyim əsas məsləhət budur: uğura gedən yolu sıfırdan kəşf etməyə ehtiyac yoxdur. Uğurlu insanların təcrübələrindən faydalanmaq və onları öz şəraitinə uyğun tətbiq etmək lazımdır. Amma bu zaman fərdilik qorunmalıdır – təqlid yox, öz yolunuzu həmin ruhla qurun.

Bundan əlavə, gənclər çoxsaylı təcrübələrdən keçməlidirlər. Könüllülük, layihələrdə iştirak və sosial şəbəkələrin yaradıcı istifadəsi onların həm fərdi, həm də peşəkar inkişafında mühüm rol oynayır. Gənclik sınaqlar dövrüdür. Səhv etməkdən qorxmadan cəhd etməli, öyrənməli və inkişaf etməlidirlər.

-Gələcək planlarınız və müəyyən etdiyiniz yeni hədəflər hansılardır?

– Əsas hədəfim təsir dairəmi genişləndirmək və daha çox gəncə dəstək olmaqdır. Mentorluq fəaliyyətimi genişləndirərək fərdi inkişaf və liderlik sahəsində daha çox gəncin potensialının üzə çıxarılmasına kömək etmək istəyirəm. Eyni zamanda, özümün təşəbbüs göstərəcəyim daha böyük və davamlı layihələr üzərində çalışmaq niyyətindəyəm.

Xüsusi hədəflərimdən biri də azərbaycanlı gənclərin beynəlxalq platformalarda daha fəal və görünən olmasına dəstək verməkdir. Uzunmüddətli vizyonum isə təhsil və gənclərlə iş sahəsində özümə məxsus bir mərkəz və ya platforma yaratmaqdır. Gənclərin həm intellektual, həm sosial baxımdan inkişaf etdiyi, cəmiyyətə təsir imkanları qazandığı bir məkan.

Bir sözlə, mənim üçün gələcək sadəcə bir gözlənti deyil, konkret addımlarla qurulan, ictimai faydayönümlü fəaliyyətlər toplusudur. Ən böyük məqsədim isə insanların həyatında müsbət iz buraxmaqdır.