İyulun 10-da baş nazir Artur Rasizadə ölkəmizdə rəsmi səfərdə olan Birləşmiş Ərəb Əmirliklərinin kommunikasıya naziri Əhməd Humeyd əl-Tayerin başçılıq etdiyi nümayəndə heyətini qəbul etmişdir. Qonaqları salamlayaraq Birləşmiş Ərəb Əmirliklərinin Azərbaycanla dost ölkə olduğunu bildirən A.Rasizadə dedi ki, dövlətlərimiz arasında hər iki tərəf üçün faydalı əməkdaşlığın mövcud olmasına baxmayaraq, BƏƏ-dən Azərbaycana ilk dəfədir ki, belə yüksək səviyyəli nümayəndə heyəti gəlir. Söhbət zamanı nümayəndə heyətinin respublikamızda səmərəli görüşlər keçirdiyi, yaxşı nəticələr əldə edildiyi bildirildi. Qeyd olundu ki, Heydər Əliyevin Azərbaycanda yenidən siyasi hakimiyyətə qayıdışından sonra respublikamızda tam sabitlik bərqərar olunmuş və genişmiqyaslı iqtisadi islahatlar aparmaq üçün böyük imkan yaranmışdır. Baş nazir bildirdi ki, bu illər ərzində ölkəmiz sanballı nailliyyətlər qazanmışdır. Lakın bu o demək deyildir ki, Azərbaycanda problemlər yoxdur. Mövcud problemlər ardıcıl olaraq həll edilir. Amma ölkəmizin ən ağır problemi – Ermənistan-Azərbaycan, Dağlıq Qarabağ münaqişəsidir ki, bu günədək həll olunmamış qalır. Düzdür, 1994-cü ildən atəşkəs əldə edilmişdir. Lakin “nə sülh, nə də müharibə” vəziyyəti əbədi davam edə bilməz. Sonra baş nazir qonaqlara Ermənistanın Azərbaycana hərbi təcavüzü nəticəsində ölkəmizin düçar olduğu məhrumiyyətlərdən, elan olunmamış müharibənin ağır nəticələrindən söz açdı. Bildirdi ki, Azərbaycan bu münaqişəni sülh yolu ilə həll etmək istəyir. Lakin Ermənistanın qeyri-konstruktiv mövqe tutması problemin həllinə mane olur. Baş nazir onu da bildirdi ki, Birləşmiş Ərəb Əmirliklərində iki ildir ki, Azərbaycanın səfirliyi fəaliyyət göstərir. Biz sizin ölkənizlə bütün sahələrdə əməkdaşlıq etmək istəyirik, əlaqələrimizin daha da inkişaf etməsinə tərəfdarıq. Yüksək səviyyəli nümayəndə heyətinin Azərbaycana səfəri bu arzunun reallaşmasına təkan verəcəkdir. Səmimi qəbula və ölkəsi barəsində xoş sözlər söylədiyinə görə baş nazirə təşəkkürünü bildirən Əhməd Humeyd əl-Tayer Birləşmiş Ərəb Əmirliklərinin prezidenti şeyx Zayid bin Sultanın şəxsi salamlarını və xoş arzularını Zati-aliləri, cənab Heydər Əliyevə çatdırmağı ondan xahiş etdi. O dedi ki, ölkələrimiz arasında mövcud olan dostluq əlaqələrinin möhkəm bünövrəsi məhz hər iki dövlətin prezidentlərinin səyləri nəticəsində yaradılmışdır. Azərbaycanda mehribanlıqla qarşılandığını, hər yerdə özünə və başçılıq etdiyi nümayəndə heyətinin üzvlərinə doğma münasibət hiss etdiyini bildirən nazir dedi ki, onun Azərbaycana səfəri çox yüksək səviyyədə hazırlanmışdır. Burada olduğu günlərdə bir sıra danışıqlar apardığını, mülki aviasiya sahəsində əməkdaşlıq barədə sənəd imzaladığını, özü ilə telekommunikasiya və poçt sahəsini əhatə edən müqavilə layihələri gətirdiyini bildirən Əhməd Humeyd əl-Tayer dedi ki, hazırda hər iki ölkənin Xarici İşlər nazirlikləri arasında sərmayələrin cəlb olunması, təşviqi və qorunması, ikiqat vergiqoymanın aradan qaldırılması ilə bağlı sənədlər ekspertlər tərəfindən öyrənilir. Qəbul ediləcək sənədlər, imzalanacaq müqavilələr ölkələrimizin xalqlarının rifahının yaxşılaşmasına xidmət edəcək, əməkdaşlığı genişləndirməyə imkan yaradacaqdır. Ölkəmizdə qısa müddətdə çox böyük nailiyyətlər əldə olunduğunu, müsbət dəyişikliklər baş verdiyini öz gözləri ilə gördüyünü bildirən nazir planlı iqtisadiyyatdan bazar iqtisadiyyatına sakit, sülh şəraitində keçən qardaş Azərbaycanda müşahidə olunan bu yüksəlişin onda iftixar hissi doğurduğunu vurğuladı. Qeyd etdi ki, Azərbaycan Respublikası və Birləşmiş Ərəb Əmirlikləri ayrı-ayrılıqda çox mühüm coğrafi-siyasi mövqeyə malik bir məkanda yerləşir. Elə bu səbəbdən də ölkələrimizin əməkdaşlığının səmərəli olacağına ümid etdiyini bildirən Əhməd Humeyd əl-Tayer bundan sonra da dövlətlərimiz arasında qarşılıqlı, yüksək səviyyəli səfərlər təşkil edilməsinin tərəfdarı olduğunu bildirdi. Dedi ki, hər iki ölkənin iş adamlarının səfərləri, Azərbaycanda, eləcə də Birləşmiş Ərəb Əmirliklərində sərmayə imkanlarının öyrənilməsi gələcək əməkdaşlığı daha da səmərəli edə bilər. Nazir Ermənistanla Azərbaycan arasında münaqişəyə toxunaraq dedi ki, bu məsələdə Birləşmiş Ərəb Əmirliklərinin prinsipial, dəyişməz və aydın mövqeyi vardır. Ölkəmiz dövlətlərin ərazilərinin güc vasitəsi ilə dəyişdirilməsini, sərhədlərin pozulmasını qətiyyətlə rədd edir. Azərbaycana səfərindən olduqca razı qaldığını bildirən nazir Əhməd Humeyd əl-Tayer gələcək əməkdaşlığın perspektivlərinə nikbinliklə baxdığını vurğuladı. Qəbulda nəqliyyat naziri Ziya Məmmədov və digər rəsmi şəxslər iştirak edirdilər.