Bakı, 14 sentyabr (AZƏRTAC). Birləşmiş Ərəb Əmirliklərində (BƏƏ) nəşr olunan "Azerbaijan" jurnalının "Sentyabr-oktyabr 2012" buraxılışı işıq üzü görmüşdür.

Xəbər verildiyi kimi, ötən il aprelin 28-də “AİTF-2011” Beynəlxalq Turizm və Səyahətlər Sərgisi çərçivəsində BƏƏ-nin "Atlantis Holiday" şirkəti ilə Azərbaycan Respublikasının Mədəniyyət və Turizm Nazirliyi arasında İran körfəzi ölkələrində Azərbaycanın turizm potensialını təbliğ etmək və turizm bazarında əlaqələrin istiqamətləndirilməsi məqsədi ilə müqavilə imzalanmış və "Azerbaijan" adlı jurnalın nəşrinə başlanmışdır.

Mədəniyyət və Turizm Nazirliyinin mətbuat xidmətindən AZƏRTAC-a bildirmişlər ki, jurnalın dördüncü nömrəsində ölkəmizin müxtəlif tarixi abidələrinə, əfsanələr diyarı Naxçıvana, ekoturizm mövzusuna, mətbəximizə, xüsusən süfrələrinin şahı olan plova dair yazılar dərc olunmuşdur.

Xalqımızın ümummilli lideri Heydər Əliyevin həyat və fəaliyyəti barədə geniş məlumat verilən nömrədə respublikamızın BƏƏ-dəki səfiri Elxan Qəhrəmanov ilə müsahibə də yer almışdır. Elxan Qəhrəmanov Azərbaycan ilə BƏƏ arasında əsas ticarət, iqtisadi əlaqələr, nəqliyyat şəbəkəsinin inkişafı barədə sualları cavablandırmış və milli turizm potensialımızı beynəlxalq səviyyəyə çatdırmaq işində böyük inkişafa nail olduğumuzu vurğulamış, turizm sektorunun hazırkı vəziyyətini yüksək qiymətləndirmişdir.

"Dünya Amerikanın Martin Lüter Kinqi və Hindistanın Mahatma Qandisindən, BƏƏ-nin ilk prezidenti Şeyx Zayedə qədər cəmiyyətin simasını dəyişən bir sıra böyük liderlərin varlığına şahid olmuşdur" sözləri ilə başlayan məqalə ümummilli lider Heydər Əliyevə həsr olunmuşdur. Müasir və müstəqil Azərbaycanın qurucusu olan Heydər Əliyevin həyat yolundan bəhs edən bu məqalədə ulu öndərimiz beynəlxalq ictimai fikrə əsaslı şəkildə təsir göstərmiş və dünyada dramatik dəyişikliklərə səbəb olan bir rəhbər kimi dəyərləndirilmişdir.

Jurnalda yer alan Naxçıvanda insanların məskunlaşma tarixi, müxtəlif şəhərləri, tarixi abidələri, "Naxçıvan" adının etimologiyası haqqında bilgilər olduqca maraqlı və rəngarəngdir. Məqalədə, həmçinin Şahbuzda yerləşən Nizami Gəncəvi poemasının qəhrəmanı "Fərhadın evi" adlı qeyri-adi mağara, hazırlanma sirri yalnız Ordubad bölgəsinə məxsus olan "ballı qayğanaq" və "İlandağ əfsanəsi" haqqında söz açılmışdır. Xüsusilə Nuhun gəmisi, Nuhun həyatı və ölümü haqqında Naxçıvan əhalisi arasında olduqca məşhur olan əfsanəyə geniş yer verilmişdir. Yazıda Nuhun böyük daşqından xilas olduqdan sonra Naxçıvanda yaşadığı, həm Nuhun, həm də onun anasının və bacısının da məhz bu regionda - Naxçıvan və Şərur yaxınlığında dəfn olunduğu barədə faktlar əksini tapmışdır.

Jurnalda, həmçinin "Azərbaycanın rəmzi abidələri" adı altında İçərişəhər, Qız qalası, Şirvanşahlar sarayı, Atəşgah, Qobustan qayaüstü rəsmləri, Mərdəkan qalaları, Çıraq qala, Şuşa və Şamaxı barədə geniş məqalə də verilmişdir.

Jurnalda yer alan digər bir məqalədə Azərbaycan xalqının müxtəlif mərasimlərində süfrələrin şahı olan plovun xüsusiyyətləri və hazırlanma qaydaları ən xırda detalları ilə təsvir edilmişdir. Azərbaycanda plovun 100-dən çox növünün olduğu qeyd olunmaqla “Şah plov”, “Turşu qovurma”, “Şüyüd plov”, “Kişmiş plov”, “Südlü aş”, “Qiymə plov”, “Səbzi plov” və “Fisincan plov”dan bəhs edilir. Yazıda düyünün dünyanın bir çox ölkələrində bişirilməsinə baxmayaraq, Azərbaycan plovunun tamının tamamilə fərqli olduğu xüsusilə vurğulanmışdır.