İQTİSADİYYAT
Biz beynəlxalq neft şirkətləri ilə zəngin əməkdaşlıq təcrübəsinə malikik
Bakı, 4 iyun (AZƏRTAC). Şirkətimizin məqsədi fəaliyyət hüdudlarını genişləndirməkdir. Beynəlxalq Xəzər neft və qaz (“Caspian Oil & Gas”) sərgisində ilk dəfə iştirak edirik və məqsədimiz Xəzər dənizinin Azərbaycan sektorunda yerli və xarici ölkələrin neft-qaz hasilatı, servis şirkətləri ilə uzunmüddətli və qarşılıqlı faydalı əməkdaşlıq əlaqələri qurmaqdır.
Bu sözləri “Caspian Oil & Gas-2014”ün iştirakçısı olan “Caspian Construction” Məhdud Məsuliyyətli Tərəfdaşlığının (MMT) Aktau filialının direktoru Stanislav Belov AZƏRTAC-a müsahibəsində demişdir.
Bildirmişdir ki, MMT dənizdə həyata keçirilən neft əməliyyatlarına xidmət göstərilməsi üzrə Qazaxıstanın özəl gəmiçilik və servis şirkətidir. Şirkət şəxsi donanmaya və istismarda olan 40-dan çox gəmiyə malikdir. Hazırda biz Xəzər dənizinin Qazaxıstan, Rusiya və Türkmənistan sektorlarında infrastruktur donanmasının istismarı və idarə olunması üzrə xidmətlər göstəririk.
Qonaq vurğulamışdır ki, beynəlxalq neft şirkətləri ilə əməkdaşlıq təcrübəsindən və peşəkar mütəxəssislər komandasından istifadə etməklə, şirkət özünün yerli filialının qeydiyyatdan keçirilməsinə və ya əməkdaşlığın digər formalarına, habelə Xəzər dənizinin Azərbaycan sektorunda uzunmüddətli və qarşılıqlı faydalı inkişaf strategiyasına sərmayə qoymağa hazırdır.