“BİZİM QURTULUŞ GÜNÜMÜZ” MÜSABİQƏSİNİN QALİBLƏRİ MÜKAFATLANDIRILMIŞLAR
Heydər Əliyev irsinin öyrənilməsi və təbliği Heydər Əliyev İrsini Araşdırma Mərkəzinin əsas fəaliyyət istiqamətlərindəndir. Mərkəzin nəzdində 2004-cü il mayın 10-da yaradılmış “Heydər Əliyev irsi” Beynəlxalq Elektron Kitabxanası ümummilli liderimizin zəngin irsini - nitq və çıxışlarını, bəyanatlarını, məktublarını internet vasitəsilə 26 dildə dünya oxucularına çatdırır.
AZƏRTAC xəbər verir ki, Mərkəzin təhsil departamenti Milli Qurtuluş gününə şagirdlərin münasibətini öyrənmək, onların fəal həyat mövqeyini müəyyənləşdirmək məqsədi ilə pilot məktəblərdə - Bakının Səbail rayonundakı 7 və 132 nömrəli, Xətai rayonunda isə 17 nömrəli orta məktəblərin yuxarı sinif şagirdləri arasında “Bizim Qurtuluş günümüz” mövzusunda inşa müsabiqəsi keçirmişdir. Müsabiqədə qalib gələn şagirdlərin inşaları və fotoşəkilləri “Bizim Qurtuluş günümüz” kitabına daxil edilmişdir.
Mərkəzdə Elmi-Redaksiya Şurası üzvlərinin, adı çəkilən məktəblərin müəllimlərinin, müsabiqə qaliblərinin iştirakı ilə həmin kitabın təqdimat mərasimi olmuşdur.
Mərasimdə Elmi-Redaksiya Şurasının sədri, akademik Asəf Nadirov, şuranın üzvü, tanınmış kinorejissor, professor Tofiq İsmayılov çıxış edərək, müsabiqənin məktəblilərin yaradıcılıq potensialını, dəyərlərimizə münasibətlərini aşkarlamaq imkanı yaratdığını vurğulamış, qalibləri təbrik etmişlər. Bildirilmişdir ki, bu tədbir Mərkəzin məktəblilərlə bağlı daha böyük miqyaslı silsilə müsabiqələrinə hazırlıq xarakteri daşıyır.
Mərasimin sonunda müsabiqə qaliblərinə diplom və xatirə hədiyyələri təqdim olunmuşdur.
Bölmənin digər xəbərləri
