BMA-nın məktəb-studiyasında Ulu Öndərin 100 illiyinə həsr olunmuş tədbir təşkil edilib
Bakı, 17 may, AZƏRTAC
Üzeyir Hacıbəyli adına Bakı Musiqi Akademiyasında Ümummilli Lider Heydər Əliyevin 100 illik yubileyi münasibətilə növbəti tədbir Orta ixtisas musiqi məktəb-studiya tərəfindən həyata keçirilib.
AZƏRTAC xəbər verir ki, tədbirdə məktəb-studiyanın böyük elmi işçisi Şəfəq Hacıyeva “Heydər Əliyev İli” çərçivəsində keçirilən tədbirlərdən danışaraq, dahi şəxsiyyəti lider kimi səciyyələndirməklə bərabər, onun mədəniyyət və incəsənətə verdiyi qiymətdən, göstərdiyi qayğıdan söz açıb.
Tədbirdə Əməkdar müəllim Nərgiz Mansurovanın sinfi fortepiano ixtisası üzrə, məktəb-studiyanın nəzəri fənlər üzrə müəllimi Rəna Məmmədovanın fortepiano ixtisası üzrə, sənətşünaslıq üzrə fəlsəfə doktoru Aytən İbrahimova və Naira Qulamovanın şagirdləri - violin ixtisası üzrə, Nərminə Əliverdizadənin fortepiano ixtisası üzrə, sənətşünaslıq üzrə fəlsəfə doktoru Tahirə Mustafayeva və Şəfəq Hacıyevanın çello ixtisası, Şəfəq Hacıyeva və Arzu Rzayevanın violin ixtisası üzrə şagirdləri çıxış etdilər.
A.Məlikovun baletlərinə müraciət edən şagirdlər tərəfindən bəstəkarın Ulu Öndər Heydər Əliyevə ithaf olunmuş “Əbədiyyət” adlı VIII simfoniyası da xatırlanıb.
Sonda məktəb-studiyanın tədris işləri üzrə direktor müavini, sənətşünaslıq üzrə fəlsəfə doktoru, BMA-nın dosenti Sevda Məmmədova iştirak edən şagird və müəllimləri təbrik edib öz təşəkkürünü bildirib. O, uzun illər çiyin-çiyinə çalışdığı ustadı, məktəb-studiyanın yaradıcısı mərhum Tərlan Seyidovun layihəsinin bir daha həyata keçirilməsinin mühüm hadisə olduğunu vurğulayıb və tədbirin keçirilməsində əməyi keçən hər kəsə - müəllim, konsertmeyster, şagird və təşkilatçılara sertifikatlar təqdim edib.
Bölmənin digər xəbərləri
