Boks yarışlarında 56 kiloqram çəki dərəcəsində rusiyalı Baxtovar Nazirov belaruslu Dmitri Asanauya 2:1 hesabı ilə qalib gələrək birinci Avropa Oyunlarının çempionu adını qazanıb.

Xatırladaq ki, çempion Baxtovar Nazirov yarımfinalda Azərbaycan idmançısı Tayfur Əliyevə qalib gəlib. Digər bürünc medalın sahibi isə britaniyalı Qaiz Aşfaq olub.

Qaliblərin mükafatlandırılması mərasimində medalları atletlərə Avropa Olimpiya Komitəsinin prezidenti Patrik Hikki təqdim edib.

Çempionun şərəfinə Rusiyanın dövlət himni səsləndirilib.

19:44

Boks yarışlarında 81 kiloqram çəki dərəcəsində mübarizə aparan Azərbaycan boksçusu Teymur Məmmədov ilə italiyalı

Valentino Manfredonia arasında final qarşılaşması başlayıb.

Azərbaycan Respublikasının Prezidenti İlham Əliyev arenada final oyununu izləyir.

19:44

Kişilər arasında 46-49 kiloqram çəki dərəcəsi üzrə final görüşündə Rusiya boksçusu Bator Saqaluyev irlandiyalı Brendan İrvini 2:1 hesabı ilə məğlub edərək birinci Avropa Oyunlarının qızıl medalını qazanıb. Bu çəkidə bürünc medallar türkiyəli Muhammed Unluya və Ukrayna təmsilçisi Dmitro Zamotayevə nəsib olub.

19:04

Qadınların mübarizəsində 69-75 kiloqramda keçirilən final görüşündə Avropa çempionu niderlandlı Nuçka Fontiyn və dünya çempionu isveçli Anna Laurel Naş qarşılaşıblar. Rəqibini 3:0 hesabı ilə məğlub edən Niderland idmançısı birinci Avropa Oyunlarının çempionu adını qazanıb.

Bu çəki dərəcəsində bürünc medalları almaniyalı Sara Şörix və polşalı Lidiya Fidura əldə ediblər.

Daha sonra 48-51 kiloqram çəki dərəcəsində qadın idmançıların mükafatlandırma mərasimi keçirilib.

Medalları qaliblərə Avropa Olimpiya Komitəsinin (AOK) İcraiyyə Komitəsinin üzvü Andrey Krasniçki təqdim edib.

Çempionun şərəfinə Niderlandın dövlət himni səsləndirilib.

18:20

Birinci Avropa Oyunlarının boks yarışlarının ilk çempionu məlum olub. Bu, qadınların yarışında 48-51 kiloqram çəki dərəcəsi üzrə mübarizənin finalında polşalı Sandra Drabiki məğlub edən Olimpiya çempionu, Böyük Britaniya boksçusu Nikola Adamsdır.

Həmin çəki dərəcəsi üzrə bürünc medallara türkiyəli Elif Coşkun və rusiyalı Sayana Saqatayeva layiq görülüblər.

18:04

“Baku Crystal Hall”da keçirilən boks yarışlarının onuncu gününün ikinci yarısı 48-51 kiloqram çəki dərəcəsində çıxış edən qadın idmançıların final görüşləri ilə başlayıb. Finalda Olimpiya çempionu, Böyük Britaniya boksçusu Nikola Adams və Avropa çempionatının gümüş medalçısı polşalı Sandra Drabik qarşılaşır.

Axşam saatlarında daha dörd çəki dərəcəsində final qarşılaşmaları keçiriləcək. Qadınların mübarizəsində 69-75 kiloqram çəki dərəcəsində Avropa çempionu niderlandlı Nuşka Fontiyn və dünya çempionu isveçli Anna Laurel Naş ilə qarşılaşacaqlar.

Kişi boksçular arasında final mərhələsində 46-49 kiloqram çəki dərəcəsində Brendan İrvin (İrlaniya) - Bator Saqaluyev (Rusiya), 56 kiloqram çəki dərəcəsində Baxtovar Nazirov (Rusiya) - Dmitri Asanau (Belarus), 81 kiloqramda isə Valentino Manfredonia (İtaliya) - Teymur Məmmədov (Azərbaycan) döyüşləri keçiriləcək.

Beləliklə, bu gün birinci Avropa Oyunlarının boks yarışlarının ilk çempionları məlum olacaq.

15:10

İyunun 25-ə səhər saatlarında yarımfinal mərhələsində keçirilən 9 görüşdən sonra 51-54, 60-64 (qadınlar), 52, 64 və 91+ kiloqramlarda finalçılar məlum olub.

Günün ilk qarşılaşmasında Azərbaycanın qadın boksçusu Anna Əlimərdanova (51-54 kq) yarımfinal mərhələsində rusiyalı Yelena Savelyevaya 0:3 hesabı ilə məğlub olaraq bürünc medalla kifayətlənməli olub. Bu çəki dərəcəsinin finalında rusiyalı Yelena Savaleva italiyalı Marzia Davide ilə qarşılaşacaq.

Qadınlar arasında ikinci yarımfinal görüşündə İtaliya idmançısı Valentina Alberti (60-64kq) polşalı Aneta Rigelskanı, Rusiya boksçusu Anastasiya Belyakova isə Böyük Britaniya təmsilçisi Sandi Rayanı mübarizədən kənarlaşdıraraq finala vəsiqə qazanıblar.

Kişilərin yarışında 52 kiloqram çəki dərəcəsində mübarizə aparan Elvin Məmişzadə yarımfinalda almaniyalı Hamza Tuba üzərində 3:0 hesabı ilə qələbə qazanaraq adını finala yazdıran ikinci Azərbaycan boksçusu olub. Avropa çempionatının mükafatçısı E.Məmişzadə finalda İtaliya boksçusu Vinçenzo Pikardi ilə döyüşəcək.

İkiqat Azərbaycan çempionu Kollazo Sotomayor (46 kq) yarımfinalda ukraynalı Viktor Petrovu mübarizədən kənarlaşdırıb - 3:0. Qızıl medal uğrunda döyüşdə onun rəqibi almaniyalı Kastriot Sopanı məğlub edən İtaliya boksçusu Vinçenzo Manyakapredir.

Doxsan bir kiloqramdan ağır çəki dərəcəsində yarımfinala vəsiqə qazanan Avropa və ikiqat dünya çempionu, Olimpiya Oyunlarının bürünc mükafatçısı Məhəmmədrəsul Məcidov əvvəlki görüşdə aldığı ağır zədə üzündən rinqə çıxmayıb. Onun rəqibi Rusiya idmançısı Qasan Qimbatov birbaşa finala vəsiqə qazanıb. Rusiyalı atletin finaldakı rəqibi Böyük Britaniya boksçusu Coy Coys olacaq.

14:38

İkiqat Azərbaycan çempionu Kollazo Sotomayor (46 kq) yarımfinalda ukraynalı Viktor Petrovu mübarizədən kənarlaşdırıb - 3:0. Qızıl medal uğrunda döyüşdə onun rəqibi almaniyalı Kastriot Sopanı məğlub edən İtaliya boksçusu Vinçenzo Manyakapredir.

14:06

Yarışda 52 kiloqram çəki dərəcəsində finala vəsiqə qazanan Avropa çempionatının bürünc mükafatçısı Elvin Məmişzadənin bu mərhələdəki rəqibi İtaliya boksçusu Vinçenzo Pikardi olacaq. V.Pikardi yarımfinalda slovakiyalı Vilyam Tankonu mübarizədən kənarlaşdırıb.

13:54

Yarışda 52 kiloqram çəki dərəcəsində mübarizə aparan Elvin Məmişzadə yarımfinalda almaniyalı rəqibi Hamza Tuba üzərində 3:0 hesabı ilə qələbə qazanaraq adını finala yazdıran ikinci Azərbaycan boksçusu olub.

AZƏRTAC xəbər verir ki, onun bu mərhələdəki rəqibi slovakiyalı Vilyam Tanko və italiyalı Vinçenzo Pikardi görüşünün qalibi olacaq.

13:49

Aişə Qurbanlı (48 kq) səkkizdəbir finalda italiyalı Valentina Moskatta, Kifayət Qasımova (57 kq) isə ilk görüşündə serbiyalı Yovana Roqiçə məğlub olublar.

13:38

Qadınlar arasında günün ikinci yarımfinal görüşündə İtaliya idmançısı Valentina Alberti (60-64kq) polşalı Aneta Rigielskanı, Rusiya boksçusu Anastasiya Belyakova isə Böyük Britaniya təmsilçisi Sandi Rayanı mübarizədən kənarlaşdıraraq finala vəsiqə qazanıblar.

Yarımfinal görüşlərini arenada Azərbaycan Respublikası Baş nazirinin birinci müavini Yaqub Eyyubov və digər rəsmi şəxslər izləyiblər.

13:21

Qadın boksçuların mübarizəsində 51-54 kiloqram çəki dərəcələrində finalçılar müəyyənləşib.

Yarımfinalda Azərbaycan idmançısı Anna Əlimərdanovanı məğlub edən rusiyalı Yelena Savaleva qızıl medal uğrunda döyüşdə italiyalı Marzia Davide ilə qarşılaşacaq.

12:49

Günün ilk qarşılaşmasında Azərbaycanın qadın boksçusu Anna Əlimərdanova (51-54 kq) yarımfinal mərhələsində rusiyalı Yelena Savelyevaya 0:3 hesabı ilə məğlub olaraq bürünc medalla kifayətlənməli olub.

12:44

Bakı, 25 iyun, A.Yadigarov. S. Allahverdiyeva, AZƏRTAC

İyunun 25-də “Baku Crystal Hall”da birinci Avropa Oyunlarının boks yarışlarının onuncu günündə yarımfinal və final görüşləri keçiriləcək.

AZƏRTAC xəbər verir ki, bu gün Azərbaycanın 4 boksçusu medallar uğrunda mübarizəyə qoşulacaq.

Günün açılış qarşılaşmasında Azərbaycan qadın boksçusu Anna Əlimərdanova (51-54kq) yarımfinal mərhələsində rusiyalı Yelena Savelyeva ilə üz-üzə gələcək.

Kişi boksçularımızdan Elvin Məmişzadə (52 kq) finala çıxmaq üçün almaniyalı rəqibi Hamza Toubaya qalib gəlməlidir.

Kollazo Sotomayor (64kq) isə yarımfinaldakı ukraynalı Viktor Petrov ilə üz-üzə gələcək.

Avropa çempionu, Olimpiya Oyunlarının bürünc mükafatçısı Teymur Məmmədov (81 kq) qızıl medal uğrunda döyüşdə Avropa çempionu italiyalı Valentino Manfredonia ilə qarşılaşacaq.

Bu gün 51-54 (qadınlar), 52, 64, 91+ (kişilər) çəki dərəcələrində yarımfinal, 48-51, 69-75 (qadınlar), 56 və 81 kiloqram çəki dərəcələrində (kişilər) isə final görüşləri keçiriləcək.