“bp-AZƏRBAYCAN” ŞİRKƏTİ 2008-Cİ İLİN “ƏN YAXŞI BİZNES” MÜKAFATLARINI TƏQDİM ETMİŞDİR
AZƏRTAC xəbər verir ki, iyunun 13-də Biznes İnkişaf Mərkəzində “bp-Azərbaycan” şirkəti tərfindən 2008-ci ilin “Ən yaxşı biznes” mükafatlarının təqdimetmə mərasimi keçirilmişdir.
Şirkətin prezidenti Bill Şreyder rəhbərlik etdiyi qurumun Azərbaycanda həyata keçirdiyi layihələr barəsində məlumat vermişdir. Qeyd etmişdir ki, “Ən yaxşı biznes” layihəsi artıq üçüncü ildir ki, keçirilir. Bu tədbirdə şirkətin əməliyyatçısı olduğu neft və qaz layihələrində öz sahibkarlıq bacarıqları ilə iştirak edən və uğur qazanan yerli və beynəlxalq şirkətlər və sahibkarlar mükafatlandırılır. Hazırda bu proqrama 50-dən çox şirkətin qoşulduğunu bildirən B.Şreyder 5 nominasiya üzrə qalibləri təbrik etmiş, onlara uğurlar arzulamışdır.
Azərbaycan Respublikası iqtisadi inkişaf nazirinin müavini Sevinc Həsənova son illər ölkə iqtisadiyyatının dinamik inkişafından danışmış, karbohidrogen ehtiyatlarının mənimsənilməsindən əldə edilən mənfəətin qeyri-neft sektoruna yönəldildiyini qeyd etmişdir.
Mərasimdə bildirilmişdir ki, dövlət başçısının birbaşa qayğı və diqqəti nəticəsində ölkəmizdə sahibkarlıq sürətlə inkişaf edir.
Mərasimdə “bp-Azərbaycan” şirkəti və tərəfdaşları adından ilin “Ən yaxşı biznes” mükafatları təqdim edilmişdir.
Bölmənin digər xəbərləri
