“Cəmiyyətin şüurlu şəkildə çirklənməyə şərait yaratması yolverilməzdir” - Könüllülər təbiətin qorunmasından danışırlar
Bakı, 19 sentyabr, Aytac Haqverdiyeva, AZƏRTAC
Təbiət, sadəcə insanın öz məqsədləri üçün deyil, eyni zamanda, bəşəriyyətin və bütün dünyanın gələcəyinin təminatıdır. Bu baxımdan, gənclərdə ətraf mühitin qorunması təfəkkürünün formalaşması daha sağlam və təhlükəsiz gələcək üçün zəmanət yaradır. Arzu olunan perspektivi isə yalnız gənclərin təbiəti dərk etməsi ilə formalaşdırmaq olar. Beton yığınları və boz çalarların hakim olduğu bir mühitdə böyümək onları bu hissdən uzaqlaşdıra bilər.
AZƏRTAC ətraf mühitin qorunmasında gənclərin rolu, bu istiqamətdə göstərilən səylər və cəmiyyətin üzərinə düşən məsuliyyət barədə iki könüllünün fikirlərini öyrənib.
İlk həmsöhbətimiz Bakı Dövlət Universitetinin (BDU) Ekologiya fakültəsinin dördüncü kurs tələbəsi, “EcoHub” İctimai Birliyinin könüllüsü Ləman Əzimovadır. O, ətraf mühitin qorunmasında nümunə olmaq, bu proseslərdə fəal iştirak etmək istəyir. Ləmanın sözlərinə görə, ekoloji maarifləndirmənin inkişafı, eləcə də ölkəmizdə tətbiq edilməsi olduqca önəmlidir. “Yaşıl gələcək”, “Xəzəri qoruyaq” kimi layihələrdə yaxından iştirak etdiyini bildirən gənc könüllü deyib: “Xəzəri qoruyaq” layihəsi artıq 15 ildir ölkəmizdə davamlı olaraq keçirilir. Layihə çərçivəsində Xəzər dənizinin sahilləri könüllülər tərəfindən tullantılardan, xüsusilə plastik tullantılar təmizlənir”.
L.Əzimova aksiyalar zamanı sahildəki tullantıların onda yaratdığı təəssüf hissindən danışıb. Vəziyyətin ürəkaçan olmadığına diqqət çəkən könüllü cəmiyyəti bu sahəyə daha həssas yanaşmağa səsləyib: “Dünyanın bizdən asılı olmayan səbəblərdən çirklənməsi kifayət qədər təhlükəlidir. Ancaq cəmiyyətin şüurlu şəkildə çirklənməyə şərait yaratması yolverilməz haldır”.
BDU-nun tələbəsi düşünür ki, könüllü olaraq ətraf mühitin qorunması, mühafizə edilməsi prosesində iştirak etmək hər bir insanın borcudur. O, gələcək nəsillərə daha yaşıl və sağlam dünya miras qoymaq üçün gənclərin üzərinə böyük vəzifə və məsuliyyət olduğunun fərqindədir: “Biz gənclər bu dünyanın gələcəyiyik. Təmiz, sağlam ətraf mühitin qorunması bizim üçün prioritet olmalıdır”.
Hazırda bütün dünyada olduğu kimi, ölkəmizdə də ekoloji çirklənmənin qarşısının alınmasının ən aktual mövzulardan biri olduğunu vurğulayan həmsöhbətimiz qeyd edib ki, bunun üçün yalnız dövlət təşkilatlarının fəaliyyəti kifayət deyil: “Cəmiyyət olaraq bilməliyik ki, bizdən sonrakı nəsillərin sağlam gələcəyinin olmağını istəyiriksə, onlara təmiz dünya ötürməliyik. Ekoloji mövzuların hər birinə fərdi və daha həssas yanaşmaq lazımdır”. L.Əzimova iştirak etdiyi təlimlərdə və könüllü fəaliyyətləri zamanı gənclərin bu istiqamətdə olduqca fəal iştirak etdiyinin şahididir. Onun sözlərinə görə, yaşıl gələcək, əsasən, ekoloji maarifləndirməni inkişaf etdirmək yolu ilə təmin edilə bilər. İştirak etdiyi təlimlərdə öyrəndiyi bilikləri ətrafındakı gənclərlə bölüşmək kiçik də olsa, vacib məsələdir: “Təlimlərdə və aksiyalarda iştirak edən hər bir könüllü dünyamızı, ölkəmizi daha təmiz, daha yaşanıla biləcək bir yer kimi görmək istəyir. Biz gələcəkdə ekoloji mühitin qorunması istiqamətində tədbirlər görülməli olduğunun fərqindəyik. Düşünürəm ki, alternativ enerjidən istifadə, yaşıl enerji iqtisadiyyatına keçid ətraf mühitin qorunması üçün atıla biləcək ən vacib addımlardan biridir”.
Digər müsahibimiz BDU-nun Ekologiya və torpaqşünaslıq fakültəsinin dördüncü kurs tələbəsi Nigar İsgəndərovadır. Onu könüllülüyə təşviq edən əsas amillərdən biri seçdiyi ixtisasla bağlı olsa da, sonradan bu sahənin qazandırdığı bilik və bacarıqların əhəmiyyətini dərindən anlamağa başlayıb: “Universitetə qəbul olduğum il seçdiyim ixtisas barədə ətraflı məlumatım yox idi. Ancaq indi bu sahənin gələcəyin xilası olduğunu düşünürəm. İnsanların bu mövzuda maariflənməsi, təbiətin qorunması bizim əsas hədəfimizdir. Biz təbiətin bir parçasıyıq və hissəsi olduğumuz ekologiyaya vurduğumuz ağır zərbə bir gün qayıdıb özümüzə dəyəcək”.
Hazırda könüllülər tərəfindən bir sıra ekoloji layihələrin icrasının davam etdiyinə diqqət çəkən N.İsgəndərova deyib ki, xüsusilə ağacəkmə, Xəzər sahillərinin təmizlənməsi ilə bağlı aksiyalar olduqca əhəmiyyətlidir. Gənc könüllü ətraf mühitin qorunması istiqamətində maarifləndirmə tədbirlərinin sadəcə gənclər və böyüklər üçün deyil, eyni zamanda uşaqlar üçün də əhəmiyyətli olduğunu düşünür: “Uşaqlarda kiçik yaşlardan etibarən ətraf mühitə qarşı sevgi və bağlılıq yaranarsa, bu, bütün yaş dövrlərində davam edəcək. Valideynlər övladlarına təbiətin qorunması mövzusunda kitablar ala bilərlər. Bundan əlavə, məktəblilərə plastik qabların istifadəsini azaltmağı, ekoçantalara keçid etməyə öyrətmək önəmlidir”.
N.İsgəndərova maarifləndirmə prosesində medianın rolunun vacib olduğuna diqqət çəkib. Onun sözlərinə görə, təbliğat həm mediada, həm də təhsil istiqamətində davam etməlidir: “Azərbaycanın BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına, yəni COP29-a ev sahibliyi etməsi ölkəmizin dünya ekologiyasının qorunmasına verdiyi töhfənin bariz nümunəsidir. Dövlətimizin təbliğ etdiyi bu məsələ insanlara nümunə olmalıdır. Dünyanı dəyişmək istəyiriksə, birinci özümüzdən başlamalıyıq. Əgər biz yaşıl gələcəkdən danışırıqsa, gənclər bu planın böyük bir hissəsidir”.
Bölmənin digər xəbərləri
