CƏNUBİ QAFQAZDA QADINLARA QARŞI ZORAKILIQ ƏLEYHİNƏ LAYİHƏ HƏYATA KEÇİRİLİR
BMT-nin Əhali Fondu (UNFPA) may ayından etibarən “Cənubi Qafqazda qadınlara qarşı zorakılıq əleyhinə” layihəsinə başlamışdır. Məqsəd insan hüquqlarının mudafiəsini, gender bərabərliyini və qadınların ictimai həyatda iştirakını təmin etməkdir.
Fondun ölkəmizdəki nüməyəndəliyindən AZƏRTAC-a bildirmişlər ki, layihə çərçivəsində qadınlara qarşı zorakılığın (xüsusilə də, ailədə zorakılığın) səbəb və nəticələrinin təhlil olunması üçün kəmiyyət və keyfiyyət araşdırmaları həyata keçiriləcək, əhalinin gender bərabərliyi haqqında bilikləri artırılacaq, qadınların hüquqlarını müdafiə etmək, onlara qarşı zorakılıq əleyhinə mübarizə aparmaq üçün plan, proqram, strategiya və qanunların yaradılmasına kömək göstəriləcək və digər problemlərin həlli istiqamətində müvafiq işlər görüləcəkdir.
Layihə Ailə, Qadın və Uşaq Problemləri üzrə Dövlət Komitəsi, Daxili İşlər, Səhiyyə və Əmək və Əhalinin Sosial Müdafiəsi nazirlikləri, Milli Məclis, qeyri-hökumət təşkilatları ilə sıx əməkdaşlıq çərçivəsində həyata keçiriləcəkdir.
Norveç hökuməti tərəfindən maliyyələşdirilən layihə 3 il davam edəcəkdir.
Bölmənin digər xəbərləri
