“CİNEMA NEWS” JURNALI VƏ SAYTI TƏQDİM OLUNMUŞDUR
AZƏRTAC xəbər verir ki, iyunun 17-də Beynəlxalq Mətbuat Mərkəzində “Ritm” MMC-nin təsis etdiyi “Cinema News” jurnalı və saytı təqdim olunmuşdur.
Azərbaycan mətbuat aləmində kino sənəti ilə bağlı yeni nəşrin işıq üzü görməsini əlamətdar hadisə kimi dəyərləndirən “Ritm” MMC-nin baş direktoru Xaqani Həşimov artıq bu sahədə müəyyən irəliləyişlərin olduğunu nəzərə çatdırmışdır. Onun sözlərinə görə, əgər 1990-cı illərdə çəkilən filmlərin sayı azlıq təşkil edirdisə, sonrakı dövrdə bu sahəyə dövlət səviyyəsində diqqət və qayğı artmış, Prezident İlham Əliyev tərəfindən isə milli kinomuzun inkişafı ilə əlaqədar müvafiq Sərəncam imzalanmışdır. Bundan sonra tammetrajlı və qısametrajlı filmlərin çəkilişi sürətlənmiş, kinostudiyanın əsaslı təmiri və kinofondun bərpası ilə bağlı tədbirlər görülmüşdür.
X.Həşimov qeyd etmişdir ki, kino ölkənin imicinin formalaşması üçün ən yaxşı vasitələrdən biridir. Jurnal və onun saytı da məhz bu ehtiyacdan yaranmışdır.
Jurnalın baş redaktoru Müqəddəs Şahbazov mətbu orqanın tərtibatından, gələcək planlardan danışaraq bildirmişdir ki, geniş oxucu kütləsi üçün nəzərdə tutulmuş nəşri daha maraqlı etməkdən ötrü redaksiya heyəti xaricdə yaşayan tanınmış prodüser və kinorejissorlarla əlaqə yaratmaq istiqamətində iş aparacaq, Azərbaycan kinosuna həsr olunmuş məlumatlara geniş yer verəcəkdir.
Bölmənin digər xəbərləri
