DÜNYA
Cırılan avro əsginasları ilə nə etmək lazımdır?
![Cırılan avro əsginasları ilə nə etmək lazımdır?](/files/2023/2/1200x630/1689602203398611962_1200x630.jpg)
Berlin, 17 iyul, AZƏRTAC
Çox güman ki, həyatında heç olmasa bir dəfə cırılmış əsginaslarla bağlı peşmançılıq hissi keçirən elə bir insan yoxdur. Təbii ki, əsginasın təsadüfən korlanmasının aşkar edilməsi yalnız emosional pozuntu hissi doğura bilər. Belə hallarda nə etməli? Onlara qarşı necə hərəkət etməli? Əsginas nə vaxta qədər öz dəyərini saxlayır, onu mağazada qəbul edəcəklərmi?
AZƏRTAC xəbər verir ki, belə hallar Almaniyada da baş verir. Lakin almanlar belə hallardan çox da narahat olmur. Kağız əsginasın cırılması onun avtomatik olaraq dəyərsiz olması demək deyil. O, ilkin dəyərini saxlayır. Əgər əsginasda cüzi zədə varsa, o, yenə də dövriyyə üçün yararlı sayılır. Zədələnmiş əsginasın ilkin səthinin ən azı üçdə ikisi toxunulmaz qalarsa, o, hələ də etibarlıdır. Bu o deməkdir ki, əsginasdan hələ də alış-veriş üçün istifadə etmək olar. Eyni zamanda, cırılmış əsginasların qəbulu ayrı-ayrı satıcıların ixtiyarına qalır. Bəzi mağazalar cırılmış pulları qəbul edəcək, bəziləri isə ondan imtina edəcəkdir. Belə hallarda cırılmış əsginas bankda asanlıqla yenisinə dəyişdirilə bilər.
Həddindən artıq zədələnmiş, çirklənmiş və ya cırılmış əsginaslar artıq qanuni ödəniş vasitəsi hesab edilmir və bankda dəyişdirilməlidir. Onlardan mağazalarda ödəniş etmək üçün istifadə etmək olmaz. Hətta ciddi zədələr də kağız pulları dəyərdən salmır, onun görünüşünü müstəqil qiymətləndirmək lazımdır. Əgər kupyur həqiqətən də çox zədələnibsə, o zaman dərhal banka gedərək onu dəyişdirmək məsləhət görülür.
Vüqar Seyidov
AZƏRTAC-ın xüsusi müxbiri
Berlin